लोणी काळभोर, ता. ७ : दिवाळीची खरेदी करून घरी परतताना गुरुदत्त मंदिरात दर्शनासाठी गेलेल्या दाम्पत्याची कार चोरट्यांनी लक्ष्य केली. कारची मागील बाजूची काच फोडून चोरट्यांनी लॅपटॉपची बॅग आणि पत्नीची पर्स असा एकूण १३ हजार रुपयांचा ऐवज चोरून नेला. ही घटना गुरुवारी (ता. ५) रात्री ७.४५ ते ८.०५ वाजण्याच्या दरम्यान कदमवाकवस्ती येथील दत्तमंदिरासमोर घडली.
याप्रकरणी गणेश बाळासाहेब चौधरी (वय ३८, रा. नायगाव, ता. हवेली) यांनी लोणी काळभोर पोलीस ठाण्यात अज्ञात चोरट्याविरोधात तक्रार दिली आहे. पोलिसांनी दिलेल्या माहितीनुसार, गणेश चौधरी आणि त्यांची पत्नी अक्षदा हे दोघेही एमआयटी कॉलेजमध्ये नोकरीला आहेत. गुरुवारी कामावरून सुटल्यानंतर दोघेही स्विफ्ट कारने (एमएच १२ डब्ल्यूयू ४४६१) दिवाळीची खरेदी करण्यासाठी फुरसुंगी येथे गेले होते. खरेदी आटोपून घरी परतताना रात्री पावणेआठच्या सुमारास त्यांनी कदमवाकवस्ती येथील दत्तमंदिरासमोर सर्व्हिस रोडवर कार पार्क केली.
कारमध्ये कार्यालयीन बॅग, त्यामध्ये लेनोवो कंपनीचा लॅपटॉप, चार्जर आणि माऊस तसेच पत्नीची गुलाबी रंगाची पर्स ठेवली होती. या पर्समध्ये रोख रक्कम, आधारकार्ड, पॅनकार्ड आणि मतदान ओळखपत्र होते. दोघेही महामार्ग ओलांडून मंदिरात दर्शनासाठी गेले. दर्शन घेऊन अवघ्या २० मिनिटांनी रात्री ८.०५ वाजता कारजवळ परतले असता, कारच्या मागील डाव्या दरवाजाची काच फुटलेली दिसली. कारची तपासणी केली असता लॅपटॉपची बॅग आणि पत्नीची पर्स गायब असल्याचे त्यांच्या निदर्शनास आले.
अज्ञात चोरट्याने कारची काच फोडून सुमारे १० हजार रुपये किमतीचा लॅपटॉप आणि तीन हजार रुपये किमतीची पर्स व त्यातील ऐवज चोरून नेल्याचे तक्रारीत नमूद करण्यात आले आहे. याप्रकरणी लोणी काळभोर पोलीस तपास करीत आहेत. दर्शनासाठी अवघ्या २० मिनिटांची अनुपस्थिती चोरट्यांच्या पथ्यावर पडल्याने नागरिकांनी वाहनात लॅपटॉप, पर्स अथवा मौल्यवान वस्तू ठेवून जाताना अधिक काळजी घेण्याची गरज पुन्हा अधोरेखित झाली आहे.
