पंढरपूर: पंढरपूरमध्ये 23 वर्षीय तरुणाचा संशयास्पद मृत्यू झाल्याची धक्कादायक घटना रविवारी रात्री समोर आली. मृत तरुणाचे नाव शुभम मोनाप्पा सुतार (वय 23) असून तो मूळचा सिद्धनाथ, ता. जत, जि. सांगली येथील रहिवासी होता. सध्या तो पंढरपुरातील गाडगे महाराज चौक परिसरात राहत होता. मृत्यूपूर्वी शुभमने आपल्या आईला पाठवलेल्या व्हॉट्सअॅप मेसेजमुळे या घटनेचे गांभीर्य वाढले आहे.
रविवारी दुपारी दीडच्या सुमारास शुभमने आईला लक्ष्मी टाकळी येथील लक्ष्मी हॉटेलचे लोकेशन पाठवले. यासोबतच ‘आई, इथे मला मारायला लागलेत, लवकर ये, मला वाचव’ असा संदेश पाठवला. मुलाचा मेसेज मिळताच आईने तातडीने लक्ष्मी हॉटेलच्या दिशेने धाव घेतली. मात्र, तेथे शुभम आढळून आला नाही.
दरम्यान, रात्री साडेदहाच्या सुमारास शुभमचा भाऊ संदीप याला रस्त्यावर एका मित्राची कार दिसली. संशय आल्याने त्याने कारजवळ जाऊन पाहिले असता शुभम गंभीर जखमी अवस्थेत कारमध्ये पडलेला दिसला. त्याच्यात कोणतीही हालचाल होत नसल्याचे लक्षात आले. कारमधील तिघांनी शुभमला ‘पंधरा मिनिटांत घरी आणून सोडतो,’ असे सांगितले. मात्र, त्यानंतर त्यांनी तेथून कारसह पळ काढला.
संदीपने संशयावरून कारचा पाठलाग सुरू केला. ही कार थेट पंढरपुरातील लाइफलाइन हॉस्पिटलमध्ये पोहोचली. तेथे डॉक्टरांनी तपासणी केल्यानंतर शुभमला मृत घोषित केले.
या घटनेनंतर पंढरपूर परिसरात खळबळ उडाली असून नातेवाईकांमध्ये संतापाचे वातावरण आहे. शुभमला नेमकी कोणत्या कारणातून मारहाण करण्यात आली, त्याचा मृत्यू कशामुळे झाला आणि कारमधील तिघांची नेमकी भूमिका काय होती, याचा तपास पोलीस करत आहेत. संशयितांच्या शोधासाठी पोलिसांची विविध पथके रवाना करण्यात आली असून रविवारी रात्री उशिरापर्यंत गुन्हा दाखल करण्याची प्रक्रिया सुरू होती.
