पुणे: शाळांमधील दिवाळी सुट्ट्यांचे नियोजन आता जाहीर होऊ लागले असून पुण्यासह लातूर, बुलढाणा आणि यवतमाळ जिल्ह्यातील विद्यार्थ्यांना सुट्टीचे वेळापत्रक स्पष्ट झाले आहे. संबंधित जिल्हा परिषदांच्या शिक्षण विभागांकडून प्राथमिक, माध्यमिक आणि उच्च माध्यमिक शाळांसाठी दिवाळी सुट्टीबाबत परिपत्रक जारी करण्यात आले आहे. त्यामुळे विद्यार्थी, पालक आणि शिक्षकांना दिवाळी तसेच प्रवासाचे नियोजन करता येणार आहे.
पुणे जिल्हा परिषदेच्या माध्यमिक शिक्षण विभागाने जाहीर केलेल्या वेळापत्रकानुसार प्रथम सत्राचा शेवट ३१ ऑक्टोबर रोजी होणार आहे. त्यानंतर २ नोव्हेंबर ते १४ नोव्हेंबर या कालावधीत शाळांना दिवाळीची सुट्टी असणार आहे. सुट्टीनंतर शाळा १६ नोव्हेंबरपासून पुन्हा सुरू होतील. या कालावधीत दिवाळीतील प्रमुख सण, लक्ष्मीपूजन, दीपावली पाडवा आणि भाऊबीज यांचा समावेश आहे.
लातूर जिल्ह्यातील प्राथमिक, माध्यमिक आणि उच्च माध्यमिक शाळांसाठी २० दिवसांची दिवाळी सुट्टी जाहीर करण्यात आली आहे. ५ नोव्हेंबरपासून सुरू होणारी ही सुट्टी २४ नोव्हेंबरपर्यंत असणार आहे. त्यानंतर २५ नोव्हेंबर रोजी शाळा नियमितपणे सुरू होतील.
शासनाच्या मार्गदर्शक सूचनांनुसार शाळांना दिवाळी आणि उन्हाळी सुट्ट्यांच्या दिवसांचे आवश्यकतेनुसार समायोजन करण्याचा अधिकार देण्यात आला आहे. मात्र, संपूर्ण शैक्षणिक वर्षातील सुट्ट्यांची संख्या ७६ दिवसांपेक्षा अधिक असता कामा नये. विद्यार्थ्यांचे शैक्षणिक नुकसान होऊ नये यासाठी वर्षभरात किमान २३० कामकाजाचे दिवस पूर्ण करणे आवश्यक आहे.
दरम्यान, सुट्टीच्या काळात शाळेतील प्रशासकीय कामकाज सुरळीत राहावे यासाठीही निर्देश देण्यात आले आहेत. मुख्याध्यापकांनी शाळा व्यवस्थापनाच्या परवानगीशिवाय, तर शिक्षकेतर कर्मचाऱ्यांनी मुख्याध्यापकांच्या परवानगीशिवाय मुख्यालय सोडू नये, असे स्पष्ट करण्यात आले आहे. त्यामुळे सुट्टी असली तरी शाळेच्या प्रशासकीय जबाबदाऱ्यांमध्ये खंड पडणार नाही.
