पुणे: पुणे जिल्ह्यातील लोणीकंद (Lonikand News) परिसरात घडलेल्या एका तरुण विवाहितेच्या मृत्यूने पुन्हा एकदा हुंडाबळी आणि कौटुंबिक छळाचा गंभीर (Pune Crime) प्रश्न समोर आणला आहे. बीड जिल्ह्यातील मूळ रहिवासी असलेली 22 वर्षीय वैष्णवी यशवंत लाटे हिने गळफास घेऊन आत्महत्या केल्याची घटना उघडकीस आली असून या प्रकरणी पतीसह सासू, सासरा आणि दिर अशा चौघांविरुद्ध गुन्हा दाखल करण्यात आला आहे. (Vishnavi Jamkar Case Pune)
वैष्णवीच्या मृत्यूमागे सातत्याने होत असलेला पैशांसाठीचा छळ कारणीभूत असल्याचा आरोप तिच्या आईने केला आहे. लग्नानंतर गेल्या सुमारे एका वर्षापासून सासरच्या मंडळींकडून पैशांची मागणी सुरू होती. सुरुवातीला विविध कारणांनी रक्कम मागितली जात होती आणि आतापर्यंत सुमारे 7 लाख रुपये देण्यात आल्याचा दावा कुटुंबीयांनी केला आहे. मात्र त्यानंतरही मागण्या थांबल्या नाहीत. उलट आणखी 20 लाख रुपयांची मागणी करण्यात आली, असा आरोप आहे.
आईच्या म्हणण्यानुसार, मुलीच्या संसारासाठी तिने स्वतःचे घर विकण्याचाही निर्णय घेतला होता. काही दिवसांपूर्वी ती स्वतः पुण्यात जाऊन सासरच्या मंडळींशी चर्चा करून परिस्थिती शांत करण्याचा प्रयत्न केला. 17 जानेवारी रोजी ती रोख रक्कम घेऊन पुण्यात गेली होती. त्यावेळीही पैशांचा तगादा कायम होता. वैष्णवीला मारहाण केली जात होती, तिला अनेक दिवस अन्न दिले जात नव्हते आणि तिचा मोबाईलही काढून घेतल्याचा गंभीर आरोप करण्यात आला आहे.
दरम्यान, घटनेच्या काही दिवस आधी वैष्णवीने आईला फोन करून पुण्यात बोलावले होते. “आणखी पैसे दिले नाहीत तर मला मारून टाकतील,” अशी भीती तिने व्यक्त केल्याचा दावा कुटुंबीयांनी केला आहे. आईने वेळ मागून परिस्थिती हाताळण्याचा प्रयत्न केला, मात्र ती परतताच मुलीने आत्महत्या केल्याची माहिती सासरच्या मंडळींकडून देण्यात आली. पोलिसांकडून या प्रकरणाचा पुढील तपास सुरू असून मृत्यूमागील नेमकी कारणे उघड करण्याचे आव्हान तपास यंत्रणेसमोर आहे.
