लोणी काळभोर, ता. 13 : जास्त भाडे आकारण्यावरून (Loni Kalbhor) झालेल्या वादातून कॅब चालकाने थेट प्रवाशांच्या कुटुंबावर हल्ला केल्याची धक्कादायक घटना लोणी काळभोर परिसरात 5 एप्रिल रोजी रात्री पावणे दहा वाजण्याच्या सुमारास घडली आहे. या प्रकारात महिलेला लाथाबुक्यांनी मारहाण करण्यात आली असून तिच्या पती व भावालाही दगडाने मारून गंभीर जखमी करण्यात आले आहे. या प्रकरणी आरोपी कॅब चालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी सरस्वती मल्लेश चलवादी (वय 29, रा. साई सृष्टी अपार्टमेंट, लोणी काळभोर) यांना भेटण्यासाठी त्यांचे नातेवाईक आले होते. त्यानंतर रात्री सुमारे 9.40 वाजता त्यांची बहीण मनिषा हिने ‘रॅपिडो’ अॅपद्वारे कॅब बुक केली. काही वेळातच संबंधित कॅब (MH12YB3584) त्यांच्या सोसायटीत आली. मात्र, अॅपवर दाखवलेल्या 271 रुपयांऐवजी चालकाने 475 रुपये भाडे मागितल्याने वाद झाला. त्यामुळे त्यांनी ती कॅब रद्द करून दुसरी कॅब बुक केली.
पहिला कॅब चालक संतप्त होऊन सोसायटी गेटजवळच थांबून राहिला. दुसरी कॅब आल्यानंतर त्याने त्या चालकाला बुकिंग रद्द करण्यास सांगत वाद घातला. यावेळी सरस्वती यांच्या पतीने “तुमचे बुकिंग रद्द केले आहे, तुम्ही जाऊ शकता,” असे सांगितल्यावर आरोपीने संतापून शिवीगाळ करत थेट त्यांच्यावर धाव घेतली.
वाद वाढत असताना सरस्वती यांनी मध्ये पडून तो सोडवण्याचा प्रयत्न केला असता, आरोपीने त्यांना शिवीगाळ करत पोटात लाथ मारली. त्यानंतर त्याने वैष्णवीच्या हातातील मोबाईल हिसकावण्याचा प्रयत्न केला. यावेळी सरस्वतींचे पती व भाऊ यशवंत यांनी हस्तक्षेप केला असता, आरोपीने दगड उचलून यशवंत यांच्या डोक्यात मारला. या हल्ल्यात यशवंत गंभीर जखमी झाले, तर पती धवल यांच्या हातालाही दगड लागून फ्रॅक्चर झाले.
या घटनेची माहिती मिळताच, पोलिस घटनास्थळी दाखल झाले; मात्र आरोपी तेथून पसार झाला. जखमींना तत्काळ विश्वराज व शिवम रुग्णालयात उपचारासाठी दाखल करण्यात आले. या प्रकरणी लोणी काळभोर पोलीस ठाण्यात आरोपी कॅब चालकाविरुद्ध भारतीय न्याय संहिता (BNS) कलम 115(2), 125(a), 351(2) अन्वये गुन्हा दाखल करण्यात आला आहे.
