पुणे: राज्यातील आयएएस अधिकाऱ्यांच्या बदल्यांचे सत्र सुरूच असून ताज्या आदेशात काही महत्त्वाच्या नियुक्त्या करण्यात आल्या आहेत. यामध्ये विशेष लक्ष वेधून घेणारी बदली म्हणजे कुलदीप जंगम यांची आहे. सोलापूर जिल्हा परिषदेचे मुख्य कार्यकारी अधिकारी म्हणून काम पाहणाऱ्या जंगम यांची आता पिंपरी-चिंचवड महानगरपालिका येथे अतिरिक्त आयुक्तपदी नियुक्ती करण्यात आली आहे.
कुलदीप जंगम हे तरुण आणि कार्यक्षम अधिकारी म्हणून ओळखले जातात. सोलापूरमध्ये त्यांनी विविध विकासकामांमध्ये सक्रिय भूमिका बजावत प्रशासनात आपली छाप पाडली होती. त्यांच्या या कामगिरीच्या पार्श्वभूमीवर त्यांना पिंपरी-चिंचवडसारख्या मोठ्या आणि महत्त्वाच्या महापालिकेत जबाबदारी देण्यात आल्याचे मानले जात आहे. शहराच्या वेगाने वाढणाऱ्या गरजा आणि विकास प्रकल्पांच्या पार्श्वभूमीवर त्यांच्याकडून महत्त्वाची भूमिका अपेक्षित आहे.
दरम्यान, इतर काही अधिकाऱ्यांच्याही बदल्या करण्यात आल्या आहेत. डॉ. बी. एन. पाटील यांची पर्यटन संचालक पदावरून उच्च व तंत्रशिक्षण विभागात प्रकल्प संचालक म्हणून बदली झाली आहे. मंगेश जोशी यांची यशदामधून पर्यटन संचालक, मुंबई येथे नियुक्ती करण्यात आली आहे.
तसेच कुशल जैन यांची सोलापूर जिल्हा परिषदेच्या मुख्य कार्यकारी अधिकारीपदी बदली करण्यात आली आहे. रेवैया डोंगरे यांना यवतमाळ येथे नवीन जबाबदारी देण्यात आली आहे.
या बदल्यांमध्ये विशेषतः कुलदीप जंगम यांची पिंपरी-चिंचवडमध्ये झालेली नियुक्ती महत्त्वाची मानली जात असून, त्यांच्या कामकाजाकडे आता सर्वांचे लक्ष लागले आहे.
