पुणे: पुण्यातील बिबवेवाडी परिसरात कौटुंबिक छळाला कंटाळून एका विवाहितेने टोकाचे पाऊल उचलत आत्महत्या केल्याची दुर्दैवी घटना घडली आहे. या प्रकरणी भारती विद्यापीठ पोलीस ठाणे यांनी सासरा आणि दीराविरुद्ध गुन्हा दाखल केला आहे.
मृत महिलेचे नाव काजल सुखदेव काळे (वय 28) असे असून त्या बिबवेवाडी मार्केटयार्ड रोड परिसरात राहत होत्या. याबाबत त्यांच्या बहिणीने पोलिसांत फिर्याद दिली आहे. त्यानुसार पोलिसांनी हनमंत काळे आणि रतन हनमंत काळे यांच्यावर गुन्हा नोंदवला आहे.
11 एप्रिल रोजी रात्री सुमारे 8.30 वाजण्याच्या सुमारास हा प्रकार घडला. पोलिसांनी दिलेल्या माहितीनुसार, कात्रज येथील वंडर सिटी परिसरात काही कुटुंबे फुटपाथवर तंबू टाकून राहतात. त्या ठिकाणी काजल काळे यांचे पती सुखदेव हे लिंबू-मिरची विक्रीसाठी बाहेर गेले होते. त्यावेळी लाकूड फोडण्याच्या कारणावरून काजल यांचे सासरे आणि दीर यांच्याशी वाद झाला.
या वादात दोघांनी काजल यांना शिवीगाळ करत मारहाण केल्याचा आरोप आहे. सतत होणाऱ्या छळामुळे त्रस्त झालेल्या काजल यांनी संतापाच्या भरात जवळील बाटलीतील पेट्रोल अंगावर ओतून घेतले आणि स्वतःला आग लावली. गंभीर अवस्थेत त्यांना तातडीने रुग्णालयात दाखल करण्यात आले. मात्र उपचारादरम्यान त्यांचा मृत्यू झाला.
या घटनेनंतर परिसरात हळहळ व्यक्त होत आहे. या प्रकरणाचा तपास गणेश मोहिते करत असून पुढील चौकशी सुरू आहे.
