करमाळा: करमाळा तालुक्यातील घोटी येथील मनोहर भोसले, जो स्वतःला संत बाळूमामांचा अवतार सांगून भाविकांची फसवणूक करत होता, त्याचे प्रकरण आता अधिक गंभीर वळणावर येऊन पोहोचले आहे. या भोंदू बाबावर आता कायदेशीर कारवाईचा बडगा उगारला जात असून, तपासात अनेक धक्कादायक गोष्टी उघड होत आहेत. या प्रकरणातील एक महत्त्वाचा दुवा म्हणून करमाळा पोलिसांनी कोल्हापूरच्या अविनाश कोतोलीकर याला अटक केली असून, त्याला 4 दिवसांची पोलीस कोठडी मिळाली आहे.
मिळालेल्या माहितीनुसार, अटकेतील अविनाश कोतोलीकर हा एका आमदाराकडे स्वीय सहाय्यक (PA) म्हणून कार्यरत होता. तो या रॅकेटमध्ये नेमका काय आणि कसा सहभाग नोंदवत होता, याचा शोध पोलीस घेत आहेत. सलग 3 दिवस चौकशी केल्यानंतर पोलिसांनी त्याला ताब्यात घेतले. यामुळे या प्रकरणाला आता राजकीय वलय प्राप्त झाले असून, पुढे आणखी काही मोठ्या नावांचा पर्दाफाश होण्याची शक्यता वर्तवली जात आहे.
फिर्यादी दिलीप राऊत यांनी दिलेल्या तक्रारीनुसार, मनोहर भोसलेने मठात दर्शनासाठी 11,000 रुपये आणि त्यानंतर मुतखड्याचा आजार बरा करण्याच्या बहाण्याने औषधांच्या नावाखाली 30,000 रुपये उकळले. इतकेच नाही, तर त्याने लाल रंगाची पावडर देऊन फसवले.
पोलीस आता या प्रकरणाची मुळापर्यंत चौकशी करत आहेत. मनोहर भोसले, नाथबाबा आणि एका अनोळखी चालकाविरुद्ध भारतीय न्याय संहिता 2023 तसेच महाराष्ट्र नरबळी, अघोरी प्रथा आणि काळी जादू प्रतिबंधक कायद्यान्वये गंभीर गुन्हे दाखल केले असून अधिक तपास सध्या सुरु आहे.
