विशाल शिंदे
खेड: पुणे–सातारा राष्ट्रीय महामार्गावरील खेड शिवापूर टोल नाक्याजवळ अवैध पार्किंगचा प्रकार मोठ्या प्रमाणात वाढल्याचे समोर आले आहे. टोल नाक्याच्या परिसरात रस्त्याच्या कडेला अवजड वाहने, खासगी बस आणि इतर वाहनांचे बेकायदेशीर पार्किंग होत असल्याने वाहतुकीला अडथळा निर्माण होत असून अपघाताचा धोका वाढला आहे.
स्थानिक नागरिकांनी याबाबत नाराजी व्यक्त करत राष्ट्रीय महामार्ग प्राधिकरण (NHAI) अधिकाऱ्यांना जाब विचारला असता, संबंधित अधिकाऱ्यांकडून उडवाउडवीची उत्तरे देण्यात आल्याचा आरोप नागरिकांनी केला आहे.
महामार्गावर आधीच वाढती वाहतूक, टोलवरील कोंडी आणि सततचे अपघात यामुळे प्रवासी त्रस्त आहेत. अशातच रस्त्यालगत होणाऱ्या अवैध पार्किंगमुळे परिस्थिती आणखी गंभीर बनत आहे. नागरिकांच्या म्हणण्यानुसार, अनेक वेळा तक्रारी करूनही कोणतीही ठोस कारवाई होत नसल्याने प्रशासनाच्या भूमिकेवर प्रश्नचिन्ह उपस्थित होत आहे.
पुणे–सातारा महामार्गावरील खेड शिवापूर टोल हा कायम चर्चेचा विषय राहिला असून टोल व्यवस्थापन, वाहतूक कोंडी आणि नागरिकांच्या तक्रारी यावर यापूर्वीही अनेकदा वाद निर्माण झाले आहेत. संबंधित विभागाने तातडीने अवैध पार्किंग हटवून वाहतूक सुरळीत करण्याची मागणी स्थानिक वाहनचालक आणि नागरिकांकडून करण्यात येत आहे.
