अहिल्यानगर : अहिल्यानगर पोलीस मुख्यालयात बकरी ईदच्या पार्श्वभूमीवर सुरू असलेल्या मॉक ड्रीलदरम्यान गंभीर दुर्घटना घडली. राखीव पोलीस आणि शीघ्र कृती दलाच्या संयुक्त जमाव विसर्जन सरावावेळी एका जवानाच्या हातात हँड ग्रेनेडचा स्फोट झाला. या घटनेत एकूण 3 पोलीस कर्मचारी जखमी झाले असून सुदैवाने कोणतीही जीवितहानी झाली नाही.
मिळालेल्या माहितीनुसार, आगामी बकरी ईदच्या पार्श्वभूमीवर कायदा व सुव्यवस्था राखण्यासाठी पोलीस दलाकडून विशेष सराव सुरू होता. अहिल्यानगर पोलीस मुख्यालयात आयोजित मॉक ड्रीलदरम्यान हँड ग्रेनेड हाताळण्याचे प्रात्यक्षिक सुरू असताना चुकून ग्रेनेडचा लिव्हर सुटल्याने तो जवानाच्या हातातच फुटला.
या स्फोटात 3 कर्मचारी जखमी झाले असून त्यांच्यावर शहरातील खासगी रुग्णालयात उपचार सुरू आहेत. एका जवानाच्या हाताला गंभीर दुखापत झाली असून करंगळी आणि हाताच्या हाडांना इजा झाल्याची माहिती समोर आली आहे. इतर दोन कर्मचारी किरकोळ जखमी झाले आहेत.
घटनेनंतर पोलीस अधीक्षक मुमक्का सुदर्शन यांनी तातडीने अधिकाऱ्यांकडून संपूर्ण माहिती घेतली. प्राथमिक माहितीनुसार, सरावादरम्यान ग्रेनेड फेकण्यापूर्वीच नियंत्रण सुटल्याने हा स्फोट झाल्याचे समोर आले आहे.
या दुर्घटनेमुळे पोलीस मुख्यालयात काही काळ गोंधळाचे वातावरण निर्माण झाले होते. मात्र, जखमी कर्मचाऱ्यांवर तातडीने उपचार सुरू करण्यात आले असून पुढील तपास आणि अंतर्गत चौकशी सुरू आहे.
