यवत, ता. २६ : खुटबाव (साळोबावस्ती, ता. दौंड) येथे किरकोळ कारणावरून एका मजुरावर लाकडी काठीने बेदम मारहाण करण्यात आल्याची घटना बुधवारी (ता. २४) सायंकाळी पाचच्या सुमारास घडली आहे. गणपती मंदिराजवळ झालेल्या या हल्ल्यात गंभीर जखमी झालेल्या तरुणावर यवत ग्रामीण रुग्णालयात उपचार सुरू असून, याप्रकरणी यवत पोलिस ठाण्यात एका व्यक्तीविरुद्ध गुन्हा दाखल करण्यात आला आहे.
विजय राजू भांडवलकर असे गुन्हा दाखल करण्यात आलेल्याचे नाव आहे. याप्रकरणी अमोल बाळासाहेब साळवे (वय २६, रा. खुटबाव, ता. दौंड) यांनी यवत पोलीस ठाण्यात फिर्याद दिली आहे. पोलिसांनी दिलेल्या माहितीनुसार, अमोल साळवे हे मजुरी करून आपल्या कुटुंबाचा उदरनिर्वाह करतात. खुटबाव येथील गणपती मंदिराजवळ अमोल साळवे उभे असताना त्यांची भाची सानिका मिरपगार हिने त्यांना आवाज दिला. त्यावेळी ते तेथे गेले असता विजय राजू भांडवलकर हा रागाने त्यांच्याकडे पाहत असल्याचे त्यांच्या लक्षात आले. “रागाने का पाहतोस?” असा जाब विचारताच दोघांमध्ये वाद झाला.
या वादानंतर विजय भांडवलकर याने शिवीगाळ व दमदाटी करत जवळच पडलेली लाकडी काठी उचलून अमोल साळवे यांच्या दोन्ही हातांवर, पाठीवर आणि छातीवर सपासप वार केले. या मारहाणीत ते गंभीर जखमी होऊन खाली कोसळले. घटनास्थळी उपस्थित असलेल्या सचिन इंगळे आणि अविनाश कोलते यांनी जखमी अमोल साळवे यांना तातडीने यवत ग्रामीण रुग्णालयात दाखल केले. सध्या त्यांच्यावर उपचार सुरू असून प्रकृती स्थिर असल्याचे सांगण्यात आले.
दरम्यान, या प्रकरणी यवत पोलिस ठाण्यात भारतीय न्याय संहिता (BNS) कलम ११८(१), ३५२, ३५१(२) व ३५१(३) अन्वये विजय राजू भांडवलकर याच्याविरुद्ध गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक भोसले करीत आहेत.
