पुणे: पुण्यातील केतन अग्रवाल हत्याप्रकरणात अटक करण्यात आलेली मुख्य आरोपी सिया गोयल सध्या पोलीस कोठडीत असून, लॉकअपमधील तिच्या कथित वर्तनाबाबत धक्कादायक माहिती समोर आली आहे. पोलीस सूत्रांच्या माहितीनुसार, लॉकअपमध्ये असतानाच सियाने पोलिसांकडे थेट बिअरची मागणी केल्याचे समोर आले आहे.
सूत्रांच्या माहितीनुसार, न्यायालयाने पोलीस कोठडी सुनावल्यानंतर सिया गोयल आणि सहआरोपी चेतन चौधरी यांच्यासाठी घरून जेवण येत आहे. याच दरम्यान सियाने पोलिसांकडे बिअरची मागणी केल्याचे सांगितले जात आहे. मात्र, ड्युटीवरील पोलिसांनी तिची ही मागणी स्पष्टपणे फेटाळून लावत तिला कडक शब्दांत समज दिली. त्यानंतर तिने याबाबत कोणतीही पुढील मागणी केली नसल्याची माहिती आहे.
दोन्ही आरोपींना सध्या वेगवेगळ्या लॉकअपमध्ये ठेवण्यात आले असून त्यांची स्वतंत्रपणे चौकशी सुरू आहे. दरम्यान, पोलिसांनी लोणावळ्यातील त्या कॅफेचे सीसीटीव्ही फुटेजही जप्त केले आहे, जिथे १७ जून रोजी सिया गोयल आणि चेतन चौधरी भेटल्याचे तपासात समोर आले आहे. तपासानुसार, दोघांनी कॅफेमध्ये बसून लोहगड किल्ल्याचे व्हिडिओ पाहत परिसराची माहिती घेतली आणि सुमारे एक तास चर्चा केल्यानंतर ते तेथून निघाले. या तांत्रिक पुराव्यांच्या आधारे पोलिसांनी तपास अधिक वेगाने सुरू ठेवला आहे.
