पुणे: पुण्यात मान्सूनपूर्व मुसळधार पावसाने जोरदार हजेरी लावत शहराला अक्षरशः झोडपून काढले. अचानक सुरू झालेल्या पावसामुळे अनेक भागांमध्ये रस्त्यांवर पाणी साचून जलमय परिस्थिती निर्माण झाली. काही ठिकाणी रस्त्यांना नदीचे स्वरूप आल्याने वाहतूक आणि नागरिकांची गैरसोय झाली.
कोंढवा परिसरात जोरदार पावसामुळे अनेक सखल भागांमध्ये पाणी साचल्याचे चित्र दिसून आले. तर हडपसरमधील वाडकर मळा परिसरात रस्त्यावर मोठ्या प्रमाणात पाणी साचून वाहू लागल्याने रस्त्याला नदीचे स्वरूप आले. त्यामुळे वाहनचालक आणि स्थानिक नागरिकांना मोठा त्रास सहन करावा लागला.
मुळशी तालुक्यातही दुपारपासून ढगांचा गडगडाट आणि विजांच्या कडकडाटासह जोरदार पाऊस झाला. काही भागांत वाऱ्यासह पावसाच्या सरी कोसळल्याने वातावरणात अचानक बदल जाणवला.
गेल्या काही दिवसांपासून पुण्यात तापमान 40 अंशांच्या पुढे गेले होते. उकाड्यामुळे नागरिक त्रस्त झाले होते. मात्र या पावसामुळे उष्णतेपासून काहीसा दिलासा मिळाला आहे. सकाळपासूनच शहरात ढगाळ वातावरण होते आणि दुपारनंतर पावसाचा जोर वाढला.
दरम्यान, पहिल्याच पावसात अनेक भागांत पाणी साचल्याने निचरा व्यवस्थेवर प्रश्नचिन्ह उपस्थित होत आहे. वाहतूक काही ठिकाणी संथ झाली असून प्रशासनाकडून परिस्थितीवर लक्ष ठेवले जात आहे. हवामान विभागाच्या अंदाजानुसार पुढील 2 दिवस पुणे शहर आणि परिसरात पावसाची शक्यता व्यक्त करण्यात आली आहे.
