लोणी काळभोर, ता. २८ : कदमवाकवस्ती येथून बेपत्ता झालेल्या १७ वर्षीय अल्पवयीन मुलीचा शोध लावण्यात लोणी काळभोर पोलिसांना यश आले असून, आरोपीला ताब्यात घेत अल्पवयीन मुलीला सुखरूप तिच्या पालकांच्या स्वाधीन करण्यात आले आहे. पोलिसांच्या या कारवाईचे परिसरातून कौतुक होत आहे.
पोलिसांनी दिलेल्या माहितीनुसार, १२ जानेवारी २०२६ रोजी सायंकाळी पाचच्या सुमारास फिर्यादी यांच्या घरातून त्यांची १७ वर्षीय मुलगी ही कोणालाही काहीही न सांगता निघून गेली होती. बराच वेळ शोध घेऊनही ती सापडली नाही. तिचा मोबाईल फोनही बंद लागत असल्याने कुटुंबीय चिंतेत पडले. परिसरात शोधाशोध करूनही मुलगी मिळून न आल्याने अखेर अज्ञात व्यक्तीने फूस लावून अल्पवयीन मुलीचे अपहरण केल्याची तक्रार मुलीच्या ३४ वर्षीय आईने लोणी काळभोर पोलीस ठाण्यात फिर्याद दिली होती.
या गुन्ह्याचा तपास सुरू असताना पोलिसांनी तांत्रिक विश्लेषण व मोबाईल लोकेशनच्या आधारे आरोपीचा माग काढला. तपासादरम्यान आरोपीचे लोकेशन येळी (ता. उमरगा, जि. धाराशिव) येथे मिळून आले. त्यानंतर लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक योगेश पैठणे, पोलीस हवालदार अण्णा माने, पोलीस अंमलदार सचिन सोनवणे व महिला पोलीस कर्मचाऱ्यांचे विशेष पथक तयार करण्यात आले.
या पथकाने धाराशिव येथे जाऊन मोठ्या शिताफीने कारवाई करत आरोपीला ताब्यात घेतले. तसेच अपहरण झालेल्या अल्पवयीन मुलीची सुखरूप सुटका करून तिला तिच्या पालकांच्या स्वाधीन करण्यात आले. दरम्यान, आरोपीविरुद्ध पुढील कायदेशीर कारवाई सुरू असून, या संपूर्ण कारवाईमुळे लोणी काळभोर पोलिसांच्या तपास कौशल्याचे पुन्हा एकदा दर्शन घडले आहे.
