पुणे: खेड तालुक्यात अन्न (Khed News) आणि औषधे विभागाचा निरीक्षक असल्याचे (Pune Crime) भासवून मेडिकल दुकानाची तपासणी करणाऱ्या आणि नसलेले दोष दाखवून 20 हजार रुपयांची मागणी करणाऱ्या तोतया निरीक्षकाला खेड पोलिसांनी ताब्यात घेतले आहे. मंगळवारी 23 डिसेंबर रोजी मेडिकल संघटनेच्या सदस्य आणि दुकानदारांच्या सतर्कतेमुळे हा प्रकार उघडकीस आला असून राजगुरुनगर शहरात खळबळ उडाली आहे. (Latest Marathi News)
20 हजार रुपयांची मागणी
आकाश कोंडुसकर (मूळ नाव आनंद भुजंग, वय 34, रा. सांगवी, पुणे) असे ताब्यात घेतलेल्या तोतया निरीक्षकाचे नाव आहे. राजगुरुनगर येथील जिल्हा व अतिरिक्त सत्र न्यायालय आवाराबाहेरील भवानी मेडिकलमध्ये हा व्यक्ती आला होता. त्याने स्वतःला अन्न आणि औषध प्रशासनाचा वरिष्ठ निरीक्षक असल्याचे सांगून मेडिकल दुकानाची तपासणी सुरू केली. तपासणीदरम्यान त्याने विविध त्रुटी दाखवून त्या दुरुस्त न केल्यास कारवाई होईल, अशी भीती घालून 20 हजार रुपयांची मागणी केली.
ओळखपत्र पाहण्याची मागणी
मेडिकल चालक तरुण चौधरी यांना संशय आल्याने त्यांनी त्या व्यक्तीकडे ओळखपत्र पाहण्याची मागणी केली. ओळखपत्र पाहिल्यानंतर त्यावरील नाव आणि तपशील नेहमी येणाऱ्या अधिकाऱ्यांपेक्षा वेगळे असल्याचे त्यांच्या लक्षात आले. यानंतर त्यांनी बाजूला जाऊन मेडिकल संघटनेतील राजू चौधरी, निलेश आरबुज आणि इतर सदस्यांना याबाबत माहिती दिली.
संघटनेच्या पदाधिकाऱ्यांनी तातडीने अन्न व औषध प्रशासनाशी संपर्क साधला. चौकशीत अशा नावाचा कोणताही अधिकारी विभागात नसल्याचे स्पष्ट झाले. त्यामुळे संबंधित व्यक्तीला थांबवून ठेवण्याचे सांगण्यात आले. मात्र संशय वाढल्याने तोतया निरीक्षक नाष्टा करून येतो, असे सांगून तेथून निसटला.
संघटनेच्या सदस्यांनी त्याचा पाठलाग केला असता तो एका सीएनजी पंपावर आपल्या वॅगन आर वाहनात गॅस भरत असल्याचे दिसून आले. सर्वांनी त्याला घेरून प्रश्न विचारल्यावर तो गडबडला. पळून जाण्याचा प्रयत्न करत असतानाच मेडिकल संघटनेच्या सदस्यांनी त्याला खेड पोलीस ठाण्यात नेले.
या प्रकरणी तोतयागिरी करून फसवणूक केल्याप्रकरणी आकाश कोंडुसकर याच्याविरोधात गुन्हा दाखल करण्यात आला असून पुढील तपास सुरू असल्याची माहिती पोलीस निरीक्षक सुभाष चव्हाण यांनी दिली आहे.
