पुणे: पुण्यातील बहुचर्चित केतन अग्रवाल हत्याकांडात नवे घडामोडी समोर येत असतानाच मुख्य आरोपी सिया गोयलच्या कुटुंबावरही मोठे संकट ओढवले आहे. या हाय-प्रोफाईल प्रकरणातील मुख्य आरोपी असलेल्या सिया गोयलच्या वडिलांना हृदयविकाराचा झटका आल्याची माहिती समोर आली आहे. प्रकृती अचानक खालावल्यानंतर त्यांना तातडीने रुग्णालयात दाखल करण्यात आले असून सध्या अतिदक्षता विभागात (ICU) त्यांच्यावर उपचार सुरू आहेत.
सिया गोयल आणि तिचा कथित प्रियकर चेतन चौधरी यांना केतन अग्रवाल हत्याप्रकरणी अटक करण्यात आल्यानंतर या प्रकरणाची राज्यभर चर्चा सुरू आहे. या घटनेचा मानसिक ताण सियाच्या कुटुंबावरही पडल्याचे बोलले जात असून, त्याचदरम्यान तिच्या वडिलांची प्रकृती बिघडल्याची माहिती समोर आली आहे.
दरम्यान, केतन अग्रवालच्या मृत्यूकडे सुरुवातीला अपघात म्हणून पाहिले जात होते. मात्र, पोलिसांच्या तांत्रिक तपासानंतर हा अपघात नसून नियोजनबद्ध हत्या असल्याचा संशय बळावला. त्यानंतर पोलिसांनी सिया गोयल आणि चेतन चौधरी यांना अटक केली असून न्यायालयाने दोघांनाही सात दिवसांची पोलीस कोठडी सुनावली आहे.
या प्रकरणाचा तपास वेगाने सुरू असून पोलिसांनी दोन्ही आरोपींची समोरासमोर चौकशी केली आहे. तपासादरम्यान चेतन चौधरीने कथितरित्या आपल्या दुकानातील कर्मचाऱ्याचा मोबाईल वापरल्याचा मुद्दाही समोर आला असून त्यासंदर्भात पोलिसांकडून अधिक तपास सुरू आहे.
दरम्यान, सिया गोयलच्या वडिलांची प्रकृती गंभीर असल्याची माहिती समोर आली असून त्यांच्यावर डॉक्टरांचे बारकाईने निरीक्षण सुरू आहे. या घडामोडीमुळे आधीच चर्चेत असलेल्या केतन अग्रवाल हत्याप्रकरणाला आणखी एक भावनिक वळण मिळाले आहे.
