न्हावरे: मांडवगण फराटा (ता. शिरूर) येथील गोकुळनगर परिसरात उसाच्या शेतात काम करत असलेल्या एका महिलेवर बिबट्याने अचानक हल्ला करण्याचा प्रयत्न केल्याची धक्कादायक घटना गुरुवारी (दि.२५) सायंकाळी सात वाजण्याच्या दरम्यान घडली. मात्र,संबंधित महिलेने प्रसंगावधान राखत वेळेत बाजूला झाल्यामुळे मोठी दुर्घटना टळली असून, परिसरात भीतीचे वातावरण निर्माण झाले आहे.
मिळालेल्या माहितीनुसार, गोकुळनगर येथील लिलाबाई बाळासाहेब फराटे या गुरुवारी सायंकाळी नेहमीप्रमाणे उसाच्या शेतात काम करत होत्या. सायंकाळी सुमारे सात वाजण्याच्या सुमारास अचानक समोरून आलेल्या बिबट्याने त्यांच्यावर झडप घालण्याचा प्रयत्न केला. हा प्रकार इतका अचानक घडला की काही क्षण त्या घाबरून गेल्या. मात्र,त्यांनी धाडस आणि प्रसंगावधान दाखवत तात्काळ बाजूला होण्याचा प्रयत्न केला. त्यामुळे बिबट्याची झेप चुकली आणि तो दुसऱ्या दिशेने निघून गेला.
या घटनेनंतर भयभीत झालेल्या लिलाबाई फराटे यांनी तत्काळ शेतातून पळ काढत घरी धाव घेतली. त्यांनी घरातील सदस्यांना घडलेला संपूर्ण प्रकार सांगितल्यानंतर परिसरातील नागरिकांमध्ये एकच खळबळ उडाली. घटनेची माहिती मिळताच ग्रामस्थांनी घटनास्थळी परिसरात पाहणी केली.
गोकुळनगर व मांडवगण फराटा परिसरात ऊस शेतीचे क्षेत्र मोठ्या प्रमाणावर असून, यापूर्वीही बिबट्याच्या हालचाली आढळून आल्याच्या चर्चा ग्रामस्थांमध्ये आहेत. त्यामुळे शेतकरी व शेतमजूर वर्गामध्ये भीतीचे वातावरण निर्माण झाले आहे. सध्या ऊस शेतीत कामासाठी मोठ्या प्रमाणावर नागरिक जात असल्याने वन विभागाने तातडीने या परिसरात पाहणी करून बिबट्यांचा बंदोबस्त करावा, अशी मागणी ग्रामस्थांकडून करण्यात येत आहे.
दरम्यान, शेतात काम करताना नागरिकांनी एकट्याने न जाता समूहाने जावे.तसेच सायंकाळनंतर शेतात काम करताना विशेष खबरदारी घ्यावी.असे आवाहनही ग्रामस्थांकडून करण्यात आले आहे.
