Junnar जुन्नर, (पुणे) : वडगाव आनंद (ता. जुन्नर) येथील एका शेतकरी कुटुंबातील चारही बहीण-भावांची पोलीस दलात निवड झाली आहे. चारही मुलांनी पोलीस दलात भरती व्हावे, हे स्वप्न वडिलांचे होते. त्यांचे मुलांनी स्वप्न पूर्ण केल्याने त्यांना अतिशय आनंद झाला आहे.
दिपक गाडेकर, अंकिता गाडेकर, सारिका गाडेकर आणि आशा गाडेकर अशी या चार भावंडांची नावं आहेत. शालेय शिक्षण जिल्हा परिषद प्राथमिक शाळा वडगाव आनंद, उच्च शिक्षण बाळासाहेब जाधव महाविद्यालय आळे या ठिकाणी पूर्ण केले आहे.
वडगाव आनंद परिसरात विजय गाडेकर हे राहण्यास आहेत. त्यांचा मुळ व्यवसाय शेती आहे. घराची हालाखीची…परिस्थितीमुळे आपल्याला शिकता आलं नाही, पण आपण आपल्या मुलांना सरकारी नोकरीत म्हणजे पोलीस खात्यात भरती करायचं असं त्यांचं स्वप्न होतं. त्यानुसार त्यांनी चारही मुलांना पाठींबा देत पोलीस भरतीच्या तयारीसाठी एका करिअर अकॅडमीमध्ये पाठविले.
त्या करिअर अकॅडमीचे शिक्षक मयूर डुंबरे आणि अनिकेत घोडेकर यांनी देखील मेहनत घेत त्यांना इथपर्यंत पोहचण्यास मदत केली.
या चारही भावंडांची महाराष्ट्र पोलीस दलात नियुक्ती झाली आहे.
२०१४ साली यांची पुणे शहर पोलीस दलात आशा गाडेकर यांची नियुक्ती झाली. त्यानंतर सारिका गाडेकर यांची २०१९ साली पुणे शहर पोलीस दलात नियुक्ती झाली. या दोघी देखील विवाहित असून सध्या त्या पुण्यामध्ये स्थायिक आहेत. त्यानंतर या वर्षी अंकिता गाडेकर आणि तिचा भाऊ दिपक गाडेकर हे दोघे देखील पोलीस दलात रुजू झाले आहेत. अकिंता ही पुणे शहर पोलीस दलात कार्यरत होणार आहे, तर दीपक हा रायगड पोलिसात रुजू होणार आहे.
एक आदर्श समाजापुढे निर्माण…!
एकामागे एक चारही भावंडांनी महाराष्ट्र पोलीस दलामध्ये भरती होऊन एक आदर्श समाजापुढे निर्माण केला आहे. आई-वडिलांच्या अथक कष्टाचं चीज या चारही मुलांनी केलं आहे. आपल्या आई वडिलांना अभिमान वाटेल अशी कामगिरी केली आहे. सर्व परिसरातून आणि वडगाव आनंद ग्रामस्थांकडून चारही भावंडांचं कौतुक केलं जात आहे.
