दौंड, (पुणे): बनावट वैद्यकीय अहवाल दुसऱ्या डॉक्टरच्या नोंदणी क्रमांकाचा गैरवापर आणि संशयास्पद ओळखपत्रांच्या आधारे विमा कंपनीकडे वैद्यकीय खर्चाचा दावा सादर करून आर्थिक फसवणूक केल्याप्रकरणी दौंड पोलिसांनी डॉक्टर दाम्पत्यासह तिघांविरुद्ध गुन्हा दाखल केला आहे. जीवनरेखा मल्टिस्पेशालिटी हॉस्पिटल दौंड येथे हा प्रकार 13 ते 19 जुलै 2024 घडला आहे.
डॉ. विशाल गोविंद मिसाळ, माधुरी विशाल मिसाळ आणि विमाधारक संकेत राजू होले असे गुन्हा दाखल करण्यात आलेल्या तिघांची नावे आहेत. याबाबत बजाज जनरल इन्शुरन्स कंपनीचे शाखा व्यवस्थापक अभिजित मोरे यांनी दौंड पोलीस ठाण्यात फिर्याद दिली आहे. त्यानुसार यांच्याविरुद्ध भारतीय न्याय संहितेतील विविध कलमांनुसार गुन्हा दाखल करण्यात आला आहे.
पोलिसांनी दिलेल्या माहितीनुसार, संकेत होले यांनी जीवनरेखा मल्टिस्पेशालिटी हॉस्पिटलमध्ये उपचार घेतल्याचे दाखवून 13 ते 19 जुलै 2024 या कालावधीतील वैद्यकीय खर्चाच्या प्रतिपूर्तीसाठी विमा दावा दाखल केला होता. या दाव्याच्या नियमित पडताळणीदरम्यान विमा कंपनीला कागदपत्रांमध्ये संशयास्पद बाबी आढळून आल्या. त्यानंतर कंपनीने सखोल तपास केला असता कथित अफरातफर समोर आली.
दाव्यासोबत डॉ. माधुरी बहिरवाडे यांच्या नावाने पॅथॉलॉजी अहवाल सादर करण्यात आला होता. या अहवालावर त्यांचे नाव, वैद्यकीय पदवी, नोंदणी क्रमांक आणि स्वाक्षरीचा शिक्का असल्याचे तक्रारीत नमूद आहे. मात्र, संबंधित वैद्यकीय नोंदणी क्रमांकाची अधिकृत संकेतस्थळावर पडताळणी केली असता तो क्रमांक डॉ. माधुरी बहिरवाडे यांच्या नावावर नसल्याचे आढळले.
इतकेच नव्हे, तर अहवालावरील क्यूआर कोड स्कॅन केल्यानंतर तो दुसऱ्याच व्यक्तीच्या नावावर असल्याचे तपासात निष्पन्न झाल्याचा दावा तक्रारीत करण्यात आला आहे. तसेच दावा अर्जासोबत सादर केलेल्या आधारकार्डावरील नाव व जन्मतारीख आणि अधिकृत वैद्यकीय नोंदणीतील नाव व जन्मतारखेतही तफावत आढळल्याचे नमूद करण्यात आले आहे. या सर्व बाबींवरून डॉक्टर नसतानाही बनावट वैद्यकीय कौन्सिल नोंदणी दाखवून, दुसऱ्या डॉक्टरच्या नोंदणी क्रमांकाचा वापर तसेच कथित बनावट कागदपत्रांच्या आधारे विमा कंपनीचा विश्वास संपादन करून आर्थिक लाभ मिळविण्याचा प्रयत्न केल्याचा आरोप आहे.
दरम्यान, डॉ. विशाल मिसाळ, माधुरी मिसाळ आणि संकेत होले यांनी संगनमत करून असत्य वैद्यकीय अहवाल, ओळखपत्रे व शिक्क्यांचा वापर करत विमा कंपनीची आर्थिक फसवणूक केल्याचा फिर्यादीचा आरोप आहे. संबंधित तिघांविरुद्ध दौंड पोलीस ठाण्यात गुन्हा दाखल करण्यात आला आहे. असून तपासअंमलदार अमीर शेख करीत आहेत.
