पुणे : यवत परिसरात यंदाचा 80 वा स्वातंत्र्यदिन अत्यंत उत्साहपूर्ण आणि देशभक्तीच्या वातावरणात साजरा करण्यात आला. ध्वजारोहणासोबतच विद्यार्थ्यांची शिस्तबद्ध प्रभातफेरी आणि सांस्कृतिक कार्यक्रमांमुळे संपूर्ण परिसर राष्ट्रभक्तीच्या रंगात रंगून गेला होता.
परिसरातील विविध शासकीय कार्यालयांमध्ये त्या-त्या कार्यालय प्रमुखांच्या हस्ते ध्वजारोहण पार पडले. यामध्ये जिल्हा परिषद शाळा क्र. 1: अविनाश कुदळे (पुणे जिल्हा परिषद सदस्य), जिल्हा परिषद शाळा क्र. 2: तेजस्विनी पडळकर (पंचायत समिती सदस्या), विद्या विकास मंदिर हायस्कूल: समीर दोरगे (ग्रामपंचायत प्रशासक)
ग्रामपंचायत, यवत पोलिस ठाणे, ग्रामीण रुग्णालय, पशुवैद्यकीय दवाखाना व पाटबंधारे विभागाच्या कार्यालयांमध्येही मान्यवरांच्या उपस्थितीत ध्वज फडकावण्यात आला.शाळकरी मुलांनी देशभक्तीपर घोषणा देत गावातून प्रभातफेरी काढली. विद्यार्थ्यांच्या आकर्षक कवायती आणि देशभक्तीपर गीतांच्या सादरीकरणाने उपस्थितांची मने जिंकली.
या कार्यक्रमात इयत्ता 10 वी व 12 वी (कला व वाणिज्य शाखा) 2026 च्या परीक्षेत यश मिळवणाऱ्या पहिल्या तीन गुणवंत विद्यार्थ्यांचा स्मृतिचिन्ह आणि रोख रक्कम देऊन सत्कार करण्यात आला. सामाजिक कार्यकर्ते भागअण्णा पवार यांच्याकडून दोन्ही शाखांतील प्रथम विजेत्या विद्यार्थिनींना विशेष पारितोषिक देण्यात आले. तसेच ‘विल्स ऑफ ड्रीम्स’ या संस्थेच्या वतीने 13 गरजू विद्यार्थ्यांना सायकलींचे वाटप करण्यात आले.
सकाळी 7:40 च्या सुमारास सर्व प्रमुख पाहुणे ध्वजारोहणासाठी उपस्थित झाले होते. मात्र, मंडळ अधिकारी वेळेवर न पोहोचल्यामुळे सुमारे 10 ते 15 मिनिटे कार्यक्रम थांबवून ठेवावा लागला. ऐनवेळी शासकीय रुग्णालयाचे ध्वजारोहण आधी उरकून घ्यावे लागले. अधिकारी वेळेवर न आल्यामुळे लहान मुलांना ताटकळत राहावे लागल्याने उपसरपंच सुभाष यादव यांनी या व्यवस्थापनावर तीव्र शब्दात नाराजी व्यक्त केली.
या सोहळ्याला यवत परिसरातील आजी-माजी लोकप्रतिनिधी, विविध संस्थांचे पदाधिकारी, शिक्षक, अंगणवाडी सेविका, ग्रामस्थ व माजी विद्यार्थी मोठ्या संख्येने उपस्थित होते.
