लोणी काळभोर : लोणी काळभोर पोलिसांनी कदमवाकवस्ती (ता.हवेली) ग्रामपंचायत घोरपडेवस्ती परिसरात कारवाई करत शासनाने प्रतिबंधित केलेला पानमसाला आणि तंबाखूजन्य पदार्थांचा मोठा साठा जप्त केला. या कारवाईत 1 लाख 91 हजार 180 रुपये किमतीचा विमल पानमसाला, तंबाखू/जर्दा व सुगंधित तंबाखू पोलिसांच्या हाती लागली. तर एकाला अटक केली आहे.
विकास किसन उतपुरे (वय २३, रा. घोरपडेवस्ती, लेन क्रमांक ३, ता. हवेली, जि. पुणे) असे अटक करण्यात आलेल्या आरोपीचे नाव आहे. याप्रकरणी पोलीस अंमलदार सचिन भिमराव सोनवणे यांनी सरकारतर्फे लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, 15 ऑगस्ट 2026 रोजी दुपारी सुमारे 12.10 वाजता घोरपडेवस्ती येथील एका घरात ही कारवाई करण्यात आली. आरोपीने शासनाने प्रतिबंधित केलेले तसेच मानवी आरोग्यास अपायकारक असलेले तंबाखूजन्य पदार्थ विक्री करण्याच्या उद्देशाने मोठ्या प्रमाणात साठवून ठेवल्याचे तपासात आढळून आल्याचे पोलिसांचे म्हणणे आहे.
या प्रकरणी पोलीस अंमलदार सचिन सोनवणे यांनी लोणी काळभोर पोलीस ठाण्यात फिर्याद दिली. त्यानुसार लोणी काळभोर पोलीस ठाण्यात भारतीय न्यायसंहितेतील संबंधित कलमांसह अन्न सुरक्षा व मानके अधिनियम, 2006 मधील विविध कलमांनुसार गुन्हा दाखल करण्यात आला आहे.
तंबाखूजन्य पदार्थांच्या सेवनामुळे मुखाचा कर्करोग तसेच विविध गंभीर आजार होण्याचा धोका असल्याची जाणीव असतानाही त्यांची विक्री करण्याच्या उद्देशाने साठवणूक केल्याचा आरोप पोलिसांनी केला आहे. या प्रकरणाचा पुढील तपास पोलीस उपनिरीक्षक जगताप करीत असून, लोणी काळभोर पोलीस ठाण्याचे पोलीस उपनिरीक्षक तैबुद्दीन मुंडे यांच्या मार्गदर्शनाखाली कारवाई करण्यात आली.
