पुणे : अन्न व औषध प्रशासनाने पुणे विभागामध्ये नियमांचे उल्लंघन करणाऱ्यांवर कडक कारवाईचा बडगा उगारला आहे. आयुक्त तुकाराम मुंढे यांच्या ‘सेफ फूड, सेफ ड्रग, सेफ महाराष्ट्र’ या अभियानाखाली 11 ते 14 ऑगस्टदरम्यान विशेष तपासणी मोहीम राबवण्यात आली. या मोहिमेत अस्वच्छता आणि सुरक्षा नियमांची पायमल्ली करणाऱ्या 16 आस्थापनांचे परवाने तात्काळ निलंबित करण्यात आले आहेत.
यामध्ये फॉर्च्यून एंटरप्रायझेस (हॉटेल सयाजी – लोणावळा), हॉटेल चूल मटण (लोहेगाव), सिम्पली साऊथ (भोसरी), हॉटेल पवन (कोल्हापूर), राजेश चायनीज (सांगली), बर्गर किंग (कॅम्प, पुणे), डॉमिनोज पिझ्झा (मलकापूर, कराड) आणि पिझ्झा हट (कराड).झेप्टो लिमिटेड (लोहेगाव), स्विन्स्टा ईएनटी प्रायव्हेट लिमिटेड (वारजे), तसेच ब्लिंक कॉमर्स प्रायव्हेट लिमिटेड (नर्हे आणि टिंबर मार्केट) यांचा समावेश आहे.
तपासणीदरम्यान वानवडी येथील ‘जेबीएम हॉस्पिटॅलिटी’ची कॅन्टीन कोणत्याही वैध परवान्याशिवाय सुरू असल्याचे समोर आले. त्यामुळे प्रशासनाने हे दुकान तातडीने बंद करण्याचे आदेश दिले आहेत.
विद्यार्थ्यांना सुरक्षित आणि पोषक आहार मिळावा यासाठी एफडीएने नवीन पाऊल उचलले आहे. शाळांच्या 50 मीटरच्या परिसरात जास्त चरबी, साखर आणि मीठ (HFSS) असलेले अन्नपदार्थ विकणाऱ्या दुकानदारांवर सोमवारपासून कठोर कारवाई केली जाणार आहे.
नागरिकांच्या आरोग्याशी खेळ करणाऱ्या आणि अन्न सुरक्षेच्या मानकांकडे दुर्लक्ष करणाऱ्या घटकांवर यापुढेही अशीच कठोर कारवाई सुरू राहील, असा स्पष्ट इशारा प्रशासनाने दिला आहे.
