इंदापूर ( संतोष पवार)
Indapur : विद्यार्थ्यांना ज्ञान,मूल्य संस्कार याबरोबरच योग्य मार्गदर्शन करून प्रेरणा देणारा शिक्षक हा समाजाच्या जडणघडणीतील महत्वाचा घटक असून एक सक्षम आणि जबाबदार नागरिक घडवण्याचे महान कार्य शिक्षकांकडून केले जाते असे प्रतिपादन राज्याचे कृषिमंत्री दत्तात्रय भरणे यांनी केले. शनिवार दिनांक ३ जानेवारी २०२६ रोजी क्रांतीज्योती सावित्रीबाई फुले यांच्या १९५ व्या जयंतीचे औचित्य साधून इंदापूर तालुका पंचायत समिती शिक्षण विभागाच्या वतीने आयोजित गुणवंत शिक्षक पुरस्कार वितरण समारंभात कृषीमंत्री दत्तात्रय भरणे बोलत होते.वाघ पॅलेस इंदापूर येथे संपन्न झालेल्या गुणवंत शिक्षक पुरस्कार वितरण सोहळ्यास क्रांतीज्योती सावित्रीबाई फुले आणि डॉ. सर्वपल्ली राधाकृष्णन यांच्या प्रतिमापूजन व दीप प्रज्वलनाने कार्यक्रमाची सुरुवात झाली. (Indapur)
यावेळी कृषिमंत्री दत्तात्रय भरणे म्हणाले कि सर्वच शिक्षक हे गुणवंत आहेत. शिक्षकच विद्यार्थ्यांच्या आयुष्याला आकार देतात आणि समाज घडवण्याचे काम करत असतात . शिक्षकांना मिळालेला गुणवंत पुरस्कार हा शिक्षणाच्या पवित्र क्षेत्रात त्यांनी केलेल्या योगदानाची व कार्याची पावती आहे .सर्व पुरस्कार प्राप्त गुणवंत शिक्षकांचे त्यांनी अभिनंदन केले . याप्रसंगी शिक्षण क्षेत्रातील असणाऱ्या शिक्षकांचे व विद्यार्थ्यांचे विविध प्रलंबित प्रश्न समस्या सोडवण्याचे तसेच पुणे मॉडेल स्कूल वाढीव शाळांसाठी निधीची तरतूद करणार असल्याचेही स्पष्ट केले . यावेळी कृषीमंत्री भरणे यांचा सन्मान इंदापूरचे गटविकास अधिकारी सचिन खुडे यांच्या हस्ते करण्यात आला. नूतन नगराध्यक्ष भरत शहा यांचा सन्मान तालुका गटशिक्षणाधिकारी निलेश गवळी यांनी केला. कार्यक्रमाचे प्रास्ताविक गटशिक्षणाधिकारी निलेश गवळी यांनी केले . शिक्षकांच्या वतीने सुप्रिया आगवणे व संतोष हेगडे यांनी मनोगत व्यक्त केले.
या समारंभात २०२३ ते २०२५ या तीन वर्षांच्या शैक्षणिक काळातील सुमारे ११६ शिक्षकांना सन्मानचिन्ह प्रमाणपत्र देऊन गुणवंत शिक्षक पुरस्काराने गौरवण्यात आले. त्याचप्रमाणे मुख्यमंत्री स्वच्छ सुंदर शाळा प्रथम द्वितीय व तृतीय क्रमांक मिळवलेल्या शाळा व अध्यक्ष चषक प्राप्त शाळा यांचा देखील सन्मान यावेळी करण्यात आला. आदर्श अधिकारी म्हणून गटविकास अधिकारी सचिन खुडे व गटशिक्षणाधिकारी निलेश गवळी यांचा विशेष सन्मान करण्यात आला. तसेच याप्रसंगी आदर्श केंद्रप्रमुख यांचाही सन्मान करण्यात आला. यावेळी केंद्रप्रमुख विस्ताराधिकारी व तालुक्यातील सर्व शिक्षक मोठ्या संख्येने उपस्थित होते. कार्यक्रमाचे सूत्रसंचालन संतोष हेगडे ,सचिन देवडे व संतोष गदादे यांनी केले.*
