Loni Kalbhor News लोणी काळभोर, ता. ५ : पुणे–सोलापूर राष्ट्रीय महामार्गालगत असलेल्या माळी मळा परिसरात आज मंगळवारी (ता.५) सकाळी झालेल्या भीषण स्फोटाने संपूर्ण परिसर दणाणून गेला. टँकरवर वेल्डिंगचे काम सुरू असतानाच टाकीत साचलेल्या गॅसमुळे अचानक झालेल्या स्फोटात एक कामगार गंभीररीत्या भाजला असून त्याच्यावर पुण्यात उपचार सुरू आहेत. या घटनेने औद्योगिक सुरक्षेवर गंभीर प्रश्नचिन्ह निर्माण केले आहे. Loni Kalbhor News
मिळालेल्या माहितीनुसार, ‘भारत वेल्डिंग वर्क्स’ या वर्कशॉपमध्ये मंगळवारी सकाळी सुमारे साडेनऊ वाजता टँकरच्या दुरुस्तीचे काम सुरू होते. काम सुरू असतानाच अचानक मोठा स्फोट झाला. स्फोटाची तीव्रता इतकी होती की पत्र्याचे शेड तुटून उडाले आणि आसपासच्या परिसरात घबराट पसरली. Loni Kalbhor News
या दुर्घटनेत चांद बाबू हा कामगार गंभीर भाजला. स्फोटानंतर तो शेडखाली अडकला होता. घटनेची माहिती मिळताच माजी उपसरपंच राजेंद्र काळभोर, अजय मोरे, अनिरुद्ध मराठे आणि रामा काळे यांनी घटनास्थळी धाव घेतली. त्यांनी प्रसंगावधान दाखवत जखमीला बाहेर काढले आणि तातडीने रुग्णवाहिका बोलावून पुण्यातील रुग्णालयात उपचारासाठी पाठवले.स्फोटामुळे टँकरचे मोठे नुकसान झाले असून काही अंतरावरपर्यंत आवाज ऐकू गेल्याने नागरिकांमध्ये भीतीचे वातावरण निर्माण झाले होते. सुदैवाने इतर कोणतीही जीवितहानी झाली नाही.
प्राथमिक माहितीनुसार, संबंधित टँकरचा वापर पेट्रोल व डिझेल वाहतुकीसाठी केला जात होता. टाकीत उरलेल्या ज्वलनशील वायूंच्या साठ्यामुळे वेल्डिंगदरम्यान ठिणगी पडून स्फोट झाला असावा, अशी शक्यता व्यक्त केली जात आहे. मात्र नेमके कारण शोधण्यासाठी तपास सुरू आहे.
दरम्यान, या घटनेमुळे औद्योगिक कामांदरम्यान सुरक्षेच्या नियमांचे पालन किती आवश्यक आहे, याची पुन्हा जाणीव झाली आहे. स्थानिक प्रशासन आणि संबंधित यंत्रणांनी या प्रकरणाची दखल घेत सखोल चौकशी सुरू केली असून, निष्काळजीपणा आढळल्यास कठोर कारवाई होण्याची शक्यता आहे. Loni Kalbhor News
