दौंड, ता. ५ : दौंड तालुक्यातील देऊळगाव राजे येथे मानवतेला काळिमा फासणारी आणि अंगावर शहारे आणणारी घटना उघडकीस आली आहे. केवळ शाळेच्या निकालावरून संतापलेल्या वडिलांनी आपल्या ९ वर्षांच्या निष्पाप मुलीची अत्यंत क्रूरपणे हत्या करून नंतर पुरावे नष्ट करण्यासाठी घरालाच आग लावल्याचा धक्कादायक प्रकार रविवारी (ता.३) दुपारच्या सुमारास उघडकीस आला आहे. या अमानुष घटनेने संपूर्ण परिसर हादरला असून नागरिकांत संतापाची लाट उसळली आहे. Daund News
पोलिसांकडून मिळालेल्या माहितीनुसार, शांताराम दुर्याधन चव्हाण (वय ३३) याने आपल्या मुलगी अनामिका (वय ९) हिची हत्या केल्याची कबुली दिली आहे. या प्रकरणात चिंगु शिंदबाद भोसले या महिलेलाही अटक करण्यात आली असून तिने घटनेची माहिती लपवण्याचा प्रयत्न केल्याचा आरोप आहे. Daund News
निकालावरून वाद, संतापाचा स्फोट
घरातील मुलांच्या शाळेच्या निकालावरून वाद सुरू झाला. मुलगा संस्कार याला पहिला क्रमांक मिळाला, तर मुलगी अनामिकाने भावाच्या गुणपत्रिकेत खोडाखोड केल्याची बाब समोर आली. यामुळे संतापलेल्या वडिलांनी प्रथम अनामिकेला मारहाण केली. घाबरलेली मुलगी घरात उपस्थित असलेल्या महिलेच्या मागे लपण्याचा प्रयत्न करत असताना, आरोपीने निर्दयीपणे लाकडे कापण्याच्या मशीनने तिच्यावर वार केले. Daund News
निर्घृण हत्या आणि पुरावे नष्ट करण्याचा प्रयत्न
या हल्ल्यात अनामिकाचा जागीच मृत्यू झाला. त्यानंतर आरोपीने मृतदेह कपड्यात गुंडाळून ठेवला आणि काही वेळाने घराला आग लावून पुरावे नष्ट करण्याचा प्रयत्न केला. या प्रकारानंतर आरोपीने मुलांना घेऊन गावात फेरफटका मारल्याचीही माहिती समोर आली आहे. Daund News
पोलिसांची तातडीची कारवाई
घटनेची माहिती नातेवाईकांकडून बाहेर येताच पोलिसांनी तातडीने घटनास्थळी धाव घेतली. जळालेल्या घरात तपास करताना अर्धवट जळालेल्या अवस्थेतील मुलीचा मृतदेह सापडला. घटनास्थळी रक्त लागलेले मशीन, जळालेल्या वस्तू आणि इतर महत्त्वाचे पुरावेही आढळले. फॉरेन्सिक पथकाला पाचारण करून पंचनामा करण्यात आला असून मृतदेह शवविच्छेदनासाठी पाठवण्यात आला आहे. आरोपीला अटक करून पुढील तपास सुरू आहे. Daund News
दरम्यान, प्रकरणी दौंड पोलीस ठाण्यात बीएनएस २०२३ अंतर्गत कलम १०३(१), २३८, ३(५) अन्वये गुन्हा दाखल करण्यात आला आहे. तपास पोलीस उपनिरीक्षक सुनिल उगले करत आहेत. या भीषण घटनेमुळे दौंड तालुक्यासह संपूर्ण परिसरात संतापाचे वातावरण असून, आरोपींना कठोरात कठोर शिक्षा देण्याची मागणी जोर धरत आहे. समाजमन सुन्न करणाऱ्या या घटनेने पुन्हा एकदा कुटुंबातील हिंसाचाराचा गंभीर प्रश्न ऐरणीवर आणला आहे. Daund News
