पुणे : लोणीकाळभोर येथील माळी मळा परिसरातील नागरिकांच्या दळणवळणाची अडचण दूर करण्यासाठी उभारण्यात आलेला रेल्वे अंडरपास पूर्ण झाला आहे. या सुविधेमुळे रेल्वे मार्ग ओलांडताना होणारी गैरसोय कमी होणार असून, स्थानिक नागरिकांसह शालेय विद्यार्थी आणि वाहनचालकांना सुरक्षित व सोयीस्कर मार्ग उपलब्ध झाला आहे.
माळी मळा परिसरात रेल्वे मार्गामुळे नागरिकांच्या दैनंदिन ये-जा करण्यास अडचणी निर्माण होत होत्या. ही समस्या दूर करण्यासाठी अंडरपास उभारण्याची मागणी करण्यात आली होती. यासाठी रेल्वे प्रशासनाकडे सातत्याने पाठपुरावा करण्यात आला. हवेलीचे माजी उपसभापती युगंधर उर्फ सनीशेठ काळभोर, माजी सरपंच भरत काळभोर, माजी ग्रामपंचायत सदस्य प्रकाश काळभोर, ह.भ.प. सोपान काळभोर यांच्यासह अमित काळभोर, राहुल काळभोर, शहाजी काळभोर, सचिन काळभोर, तुषार काळभोर, चेतन काळभोर, अमोल काळभोर, सौरभ काळभोर, सागर काळभोर आणि निलेश ओझरकर आदींनी रेल्वे प्रशासनाकडे पाठपुरावा केला.
या पाठपुराव्याची दखल घेत रेल्वे प्रशासनाने अंडरपासचे काम पूर्ण करण्याचे आश्वासन दिले होते. त्यानुसार अंडरपासचे काम पूर्ण करण्यात आले आहे. त्यामुळे नागरिकांना रेल्वे मार्ग ओलांडण्यासाठी पर्यायी मार्ग उपलब्ध झाला आहे.
अंडरपासमुळे विशेषतः शालेय विद्यार्थ्यांच्या दैनंदिन ये-जा करण्याची सोय होणार आहे. तसेच परिसरातील नागरिक आणि वाहनचालकांनाही या सुविधेचा फायदा होणार आहे. अनेक वर्षांपासूनची मागणी पूर्ण झाल्याने माळी मळा परिसरातील नागरिकांनी समाधान व्यक्त केले आहे. या अंडरपासमुळे परिसरातील दळणवळण अधिक सुलभ होऊन नागरिकांचा वेळ आणि गैरसोय कमी होण्यास मदत होणार आहे.
