मुंबई : मुंबईच्या पाच प्रमुख प्रवेशद्वारांवरील टोल नाक्यांवर १ ऑक्टोबर २०२६ पासून सुधारित टोल दर लागू झाले आहेत. महाराष्ट्र राज्य रस्ते विकास महामंडळाने (एमएसआरडीसी) वाशी, ऐरोली, मुलुंड, एलबीएस आणि दहिसर येथील टोलनाक्यांवरील काही वाहनांच्या टोल दरात वाढ केली आहे. त्यामुळे मुंबईत ये-जा करणाऱ्या मिनी बस, एलसीव्ही, ट्रक, बस आणि अवजड वाहनांना आता अधिक टोल द्यावा लागणार आहे.
नव्या दरानुसार मिनी बस आणि एलसीव्ही वाहनांसाठी ९० रुपये, ट्रक आणि बससाठी १८० रुपये, तर अवजड वाहनांसाठी २२५ रुपये टोल आकारला जाणार आहे. वाहनांच्या प्रकारानुसार या दरांमध्ये १५ ते ३५ रुपयांची वाढ करण्यात आली आहे. हे सुधारित दर १ ऑक्टोबरपासून लागू झाले आहेत.
मुंबईतील वाहतूक कोंडी कमी करून शहरातील प्रवास अधिक वेगवान करण्याच्या उद्देशाने एमएसआरडीसीने विविध ठिकाणी ५५ उड्डाणपूल बांधले आहेत. या उड्डाणपुलांच्या बांधकामासाठी झालेला खर्च वसूल करण्यासाठी मुंबईच्या पाच प्रवेशद्वारांवर पथकर वसुली केली जाते. वाशी, ऐरोली, मुलुंड, एलबीएस आणि दहिसर या पाच ठिकाणी टोलनाके कार्यरत आहेत.
दरम्यान, हलकी खासगी वाहने, शालेय वाहने तसेच एसटी आणि बेस्टच्या बसना ऑक्टोबर २०२४ पासून टोलमाफी देण्यात आली आहे. सुधारित दर लागू झाल्यानंतरही या वाहनांसाठीची टोलमाफी कायम राहणार आहे. त्यामुळे टोलवाढीचा थेट परिणाम मुख्यतः व्यावसायिक आणि अवजड वाहनांवर होणार आहे.
या पाच टोलनाक्यांवरून दररोज साडेतीन लाखांहून अधिक वाहनांची ये-जा होत असल्याचे सांगण्यात येते. यापैकी सुमारे ८० टक्के वाहने हलकी आणि टोलमुक्त असल्याने त्यांना या दरवाढीचा परिणाम होणार नाही.
मुंबईच्या प्रवेशद्वारांवरील टोल दरात दर तीन वर्षांनी सुधारणा केली जाते. यापूर्वी ऑक्टोबर २०२३ मध्ये टोलच्या दरात बदल करण्यात आला होता. त्यानंतर आता नवीन दर लागू करण्यात आले आहेत. या पाच टोलनाक्यांवरील टोलवसुलीची मुदत सप्टेंबर २०२९ पर्यंत वाढवण्यात आली आहे.
