आदित्य बोराटे
इंदापूर: इंदापूर पोलीस ठाण्यात दाखल असलेल्या जबरी चोरीच्या गुन्ह्याचा यशस्वी छडा लावत स्थानिक गुन्हे शाखेच्या पथकाने दोन आरोपींना जेरबंद केले. आरोपींकडून चोरीस गेलेल्या ऐवजासह गुन्ह्यात वापरण्यात आलेली मोटारसायकल, असा एकूण ५६ हजार रुपयांचा मुद्देमाल जप्त करण्यात आला आहे.
इंदापूर पोलीस ठाण्यात गुन्हा रजिस्टर क्रमांक १९८/२०२६ अन्वये दाखल असलेल्या जबरी चोरीच्या गुन्ह्याचा तपास सुरू असताना, स्थानिक गुन्हे शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली बारामती विभागाच्या पथकाने गोपनीय माहिती व तांत्रिक विश्लेषणाच्या आधारे तपासाची चक्रे वेगाने फिरवली. त्याअनुषंगाने कृष्णा राजू गिरी (वय २०, रा. अकलूज, ता. माळशिरस, जि. सोलापूर) व वैभव देविदास साळुंखे (वय २२, रा. अकलूज, ता. माळशिरस, जि. सोलापूर) या दोघांना ताब्यात घेण्यात आले.
चौकशीत आरोपींकडून चोरीस गेलेला विवो कंपनीचा वाय-९० मॉडेलचा मोबाईल, फॉसिल कंपनीचे मनगटी घड्याळ तसेच गुन्ह्यात वापरण्यात आलेली होंडा स्प्लेंडर मोटारसायकल, असा एकूण ५६ हजार रुपयांचा मुद्देमाल हस्तगत करण्यात आला. जप्त मुद्देमाल व आरोपींना पुढील कायदेशीर कारवाईसाठी इंदापूर पोलीस ठाण्याच्या ताब्यात देण्यात आले आहे.
ही उल्लेखनीय कामगिरी पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी (बारामती विभाग) मधुकर भट्टे तसेच स्थानिक गुन्हे शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली पोलीस उपनिरीक्षक कारंडे, सहाय्यक पोलीस उपनिरीक्षक शिवाजी निकम, पोलीस हवालदार किशोर तेलंग, राजू मोमीन, स्वप्निल अहिवळे, अजय घुले, सुलतान डांगे, गुलाब पाटील, शैलेश स्वामी, पोलीस अमलदार रहिस मुलाणी, गणेश डेरे आणि तुषार चव्हाण यांनी केली.
