आदित्य बोराटे
पुणे: इंदापूर (Indapur News) शहरात रस्त्यावर उभ्या असलेल्या वाहनांची चोरी करण्याच्या प्रयत्नात असलेल्या दोन आरोपींना स्थानिक पोलिसांनी शनिवारी पहाटेच्या सुमारास रंगेहाथ पकडले. या कारवाईत पोलिसांनी 80 हजार रुपये किमतीच्या 2 मोटारसायकली जप्त केल्या आहेत.
गस्तीदरम्यान केली अटक
इंदापूर पोलीस ठाण्याचे पोलीस निरीक्षक विलास नाळे यांच्या मार्गदर्शनाखाली गुन्हे शोध पथकाचे अंमलदार तुषार चव्हाण, अंकुश माने, सूरज गुंजाळ, विनोद लोखंडे आणि योगेश करचे यांचे पथक शुक्रवारी (7 नोव्हेंबर) रात्री शहरात गस्त घालत होते. गस्त सुरू असताना शहरातील बाबा चौकात दोन व्यक्ती दुचाकीवर संशयितरित्या फिरताना पोलिसांना आढळले. पोलिसांनी त्यांना तात्काळ ताब्यात घेऊन कसून चौकशी केली. चौकशीदरम्यान, त्यांनी ताब्यात असलेल्या दोनही दुचाकी चोरीच्या असल्याचे कबूल केले.
आरोपींची नावे आणि पुढील तपास:
ताब्यात घेण्यात आलेल्या दुचाकी चोरांची नावे सलीम महबूब शेख (वय 28) आणि नितीन सखाराम हरिहर (वय 35) अशी आहेत. हे दोघेही इंदापूर तालुक्यातील मदनवाडी येथील रहिवासी आहेत. पोलीस निरीक्षक विलास नाळे यांनी दिलेल्या माहितीनुसार, आरोपींकडून जप्त केलेल्या मोटारसायकलींच्या संदर्भात पुढील तपास सुरू आहे.
यशस्वी कामगिरी:
पुणे ग्रामीणचे पोलीस अधीक्षक संदीप गिल, अप्पर पोलीस अधीक्षक गणेश बिरादार आणि उपविभागीय पोलीस अधिकारी डॉ. सुदर्शन राठोड यांच्या मार्गदर्शनाखाली इंदापूर पोलिसांनी ही यशस्वी कामगिरी केली. या कारवाईत पोलीस निरीक्षक विलास नाळे, सपोनी शंकर राऊत, सपोनी जीवन मोहिते, तसेच गुन्हे शोध पथकातील अंमलदार यांचा सहभाग होता.
