आदित्य बोराटे
Indapur Crime : इंदापूर: इंदापूर तालुक्यात बेकायदेशीर वाळू वाहतुकीवर पोलिसांनी मोठी कारवाई केली आहे. या कारवाईत एकूण 14 लाख 24 हजार रुपयांचा मुद्देमाल जप्त करण्यात आला. पुणे–सोलापूर महामार्गावर हिंगणगाव परिसरात ही कारवाई करण्यात आली असून यामुळे वाळू तस्करी करणाऱ्यांमध्ये खळबळ उडाली आहे.
पोलिसांना या भागात बेकायदेशीर वाळू उत्खनन करून वाहतूक केली जात असल्याची माहिती मिळाली होती. त्यानुसार पोलिसांनी सापळा रचून कारवाई केली. या वेळी 2 टिपर वाहने आणि सुमारे 4 ब्रास वाळू जप्त करण्यात आली. जप्त करण्यात आलेल्या मुद्देमालाची एकूण किंमत 14 लाख 24 हजार रुपये इतकी असल्याचे सांगण्यात आले.
या प्रकरणी पाच जणांविरोधात गुन्हा दाखल करण्यात आला आहे. त्यामध्ये विशाल रामदास जाधव (वय 25, रा. तांबवे, ता. माढा, जि. सोलापूर), मंगेश महादेव खटके (रा. सापटणे, ता. माढा, जि. सोलापूर), कृष्णा संदिपान पैठणे (वय 28, रा. सापटणे, ता. माढा, जि. सोलापूर), संदीप काशिनाथ कुऱ्हाडे (रा. वासू शेगाव, ता. गंगापूर, जि. संभाजीनगर) आणि विशाल जगताप (रा. शहा, ता. इंदापूर, जि. पुणे) यांचा समावेश आहे.
पोलिसांनी संबंधितांविरुद्ध गुन्हा नोंदवला असून पुढील तपास सुरू आहे. या कारवाईमुळे बेकायदेशीर वाळू वाहतुकीवर काही प्रमाणात आळा बसेल, अशी अपेक्षा व्यक्त केली जात आहे. प्रशासनाकडून अशा प्रकारच्या कारवाया पुढेही सुरू राहणार असल्याचे संकेत देण्यात आले आहेत.
