शिरूर : तक्रारदार व त्यांच्या कुटुंबीयांविरुद्ध दाखल असलेल्या गुन्ह्यात अटक न करण्यासाठी तसेच गुन्ह्याच्या तपासात मदत करण्याच्या मोबदल्यात एक लाख रुपयांची लाच मागून त्यापैकी 95 हजार रुपये स्वीकारताना शिरूर पोलीस ठाण्याच्या अंतर्गत टाकळी हाजी पोलीस चौकीच्या पोलीस हवालदाराला पुणे लाचलुचपत प्रतिबंधक विभागाने (एसीबी) रंगेहाथ पकडले.ही कारवाई मंगळवारी (ता.30) टाकळी हाजी पोलीस चौकी येथे करण्यात आली.
एसीबीने दिलेल्या माहितीनुसार, सतीश नाथाराव मुंढे (वय ४५, पोलीस हवालदार,शिरूर पोलीस ठाणे,पुणे ग्रामीण) असे कारवाई करण्यात आलेल्या पोलीस आरोपीचे नाव आहे. तक्रारदार (वय ५९) यांच्या व त्यांच्या कुटुंबीयांविरुद्ध शिरूर पोलीस ठाण्यात एक गुन्हा दाखल आहे. या गुन्ह्याचा तपास पोलीस हवालदार सतीश मुंढे यांच्याकडे होता. या प्रकरणात तक्रारदार व त्यांच्या कुटुंबीयांना अटक न करण्यासाठी तसेच गुन्ह्यामध्ये मदत करण्यासाठी लोकसेवक सतीश मुंढे यांनी तक्रारदाराकडे एक लाख रुपयांची लाच मागितल्याचा आरोप करण्यात आला होता.याबाबत तक्रारदाराने पुणे लाचलुचपत प्रतिबंधक विभागाकडे तक्रार केली होती.
तक्रारीची पडताळणी केल्यानंतर एसीबीच्या पथकाने मंगळवारी (ता.३०) टाकळी हाजी पोलीस चौकी येथे सापळा रचला. यावेळी तडजोडीनंतर ९५ हजार रुपये लाचेची रक्कम स्वीकारताना पोलीस हवालदार सतीश मुंढे यांना एसीबीच्या पथकाने ताब्यात घेतले. कारवाईनंतर आरोपीकडून लाचेची रक्कम जप्त करण्यात आली असून, पुढील कायदेशीर कारवाई करण्यात आली आहे.
या प्रकरणी भ्रष्टाचार प्रतिबंधक कायद्यातील विविध कलमांच्या अंतर्गत शिरूर पोलीस ठाण्यात पोलीस हवालदार सतीश मुंडे यांच्या विरोधात गुन्हा दाखल करण्यात आला आहे.ही कारवाई पुणे लाचलुचपत प्रतिबंधक विभागाच्या वरिष्ठ अधिकाऱ्यांच्या मार्गदर्शनाखाली करण्यात आली. या कारवाईमध्ये लाचलचपत प्रतिबंधक विभागाच्या अधिकारी व कर्मचाऱ्यांचा सहभाग घेतला होता.
नागरिकांना एसीबीचे आवाहन
कोणत्याही शासकीय अधिकारी अथवा कर्मचाऱ्याने शासकीय काम करून देण्यासाठी किंवा कामात मदत करण्याच्या मोबदल्यात लाचेची मागणी केल्यास नागरिकांनी लाचलुचपत प्रतिबंधक विभागाशी संपर्क साधावा,असे आवाहन लाच लुचपत प्रतिबंधक विभागाचे पोलीस उपाधीक्षक सतीश वाळके यांनी केले आहे.
