उरुळी कांचन (पुणे) : ‘ओपन जेवू देईना आणि क्लोज झोपू देईना…’ हे जुने वाक्य सध्या उरुळी कांचन पोलीस ठाण्याच्या हद्दीत तंतोतंत खरे ठरताना दिसत आहे. उरुळी कांचन आणि परिसरात सध्या मटक्याचा जुगार खुलेआम सुरू असून, पोलिसांच्या जाणीवपूर्वक दुर्लक्षामुळे या अवैध धंद्याला अक्षरशः उधाण आले आहे. मटक्याच्या चिठ्ठ्या उघड-उघड हाती लागत असतानाही कोणतीही ठोस कारवाई होत नसल्याने, “हे दुकान पोलिसांच्याच पाठिंब्याने चालले आहे का?” असा संतापजनक सवाल आता नागरिक विचारत आहेत.
कालपर्यंत फुटकळ असलेले मटका एजंट आणि मालक आज लाखोपती झाले आहेत. सामान्यांना ‘ओपन-क्लोज’च्या जाळ्यात ओढून त्यांचे खिसे रिकामे करणे आणि स्वतःचे खिसे भरणे, हाच यांचा एककलमी कार्यक्रम बनला आहे. आकडेमोडीच्या या नादात शेकडो कुटुंबे उद्ध्वस्त झाली आहेत. अनेक जण घरातील दागदागिने विकून कर्जबाजारी झाले आहेत. या जीवघेण्या सवयीच्या जाळ्यात तरुण मुलांपासून ते वयोवृद्धांपर्यंत सर्वच अडकले आहेत.
समाजात नैतिकदृष्ट्या शून्य किंमत असलेले हे गुन्हेगार आज हप्त्यांच्या जोरावर संपूर्ण यंत्रणेला खिशात घालून फिरत आहेत. पोलिसांना इच्छा असेल तर या मटकामालकांना जेरीस आणण्यासाठी अवघा ‘एक तास’ पुरेसा आहे. परंतु, “मटका बंद झाला तर पोलिसांचा हप्ता बंद होईल,” या भीतीपोटीच पोलीस गप्प आहेत की काय, असा संशय बळावला आहे.
दरम्यान, उरुळी कांचन पोलिसांनी उरुळी कांचन हद्दीतील बाजार मैदान परिसरात शुक्रवारी (ता. 31) सायंकाळी तुटपुंजी कारवाई केल्याची माहिती मिळत आहे. तर याप्रकरणी दोघांना ताब्यात घेतल्याची माहिती मिळत असून दोघांवर गुन्हा दाखल करण्यात आला आहे.
पोलिसांची ‘टेहळणी’ अन् केवळ देखावा..
मटकामालक, त्यांचे हस्तक आणि त्यांची संपूर्ण नस ना नस काही ठराविक पोलिसांना आणि अधिकाऱ्यांना ठाऊक आहे. असे असूनही, एखाद्या ठिकाणी बातमी आली किंवा वरिष्ठ फिरणार असले, की त्या दिवशी पुरता व्यवहार बंद ठेवला जातो. पोलीस फक्त ‘टेहळणी’ करून निघून जातात आणि आपण फार सतर्क आहोत असा बनाव रचतात.
