लोणी काळभोर, ता. ३ : कदमवाकवस्ती (ता. हवेली) येथील साई ओम बिल्डिंगमध्ये भरदिवसा घरफोडीची धक्कादायक घटना घडली असून, उघड्या राहिलेल्या दरवाजाचा फायदा घेत अज्ञात चोरट्याने लोखंडी कपाटातील लॉकर फोडून सुमारे ८ लाख रुपये किमतीचे सोन्या-चांदीचे दागिने आणि रोख रक्कम लंपास केल्याची घटना उघडकीस आली आहे.
याप्रकरणी ज्ञानदेव जगन्नाथ कदम (वय ४७, रा. साई ओम बिल्डिंग, संभाजीनगर, कदमवाकवस्ती, लोणी काळभोर) यांनी फिर्याद दिली आहे. त्यानुसार अज्ञात चोरट्याविरुद्ध लोणी काळभोर पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी कदम हे विश्वराज हॉस्पिटलमध्ये सुरक्षा पर्यवेक्षक (सिक्युरिटी सुपरवायझर) म्हणून कार्यरत आहेत. त्यांनी फुरसुंगी येथे बांधकाम सुरू केले असून ते व त्यांची पत्नी दररोज सकाळी ते रात्रीपर्यंत बांधकामाच्या ठिकाणी जात असत.
दरम्यान, ८ जुलै ते २ ऑगस्ट या कालावधीत घराचा दरवाजा उघडा राहिल्याचा फायदा घेत अज्ञात चोरट्याने घरात प्रवेश केला. चोरट्याने बेडरूममधील लोखंडी कपाटाचे लॉकर फोडून त्यातील सोन्याचे मणी, मिनी गंठण, नेकलेस, अंगठी, चांदीचे पैजण तसेच २० हजार रुपयांची रोकड असा एकूण सध्याच्या बाजारभावानुसार सुमारे ८ लाख रुपयांचा ऐवज लंपास केला आहे.
या घटनेची माहिती मिळताच फिर्यादीने ११२ या आपत्कालीन क्रमांकावर संपर्क साधला. पोलिसांनी घटनास्थळी धाव घेऊन पंचनामा केला असून परिसरातील सीसीटीव्ही फुटेजची तपासणी सुरू केली आहे. या प्रकरणी लोणी काळभोर पोलिसांनी अज्ञात चोरट्याविरुद्ध चोरीचा गुन्हा दाखल केला असून, चोरट्यांचा शोध घेण्यासाठी विशेष पथके कामाला लागली आहेत. या घटनेनंतर परिसरात वाढत्या घरफोड्यांबाबत चिंता व्यक्त केली असून, पोलिसांनी रात्रीची गस्त वाढवून चोरट्यांवर वचक बसवावा, अशी मागणी स्थानिक नागरिकांनी केली आहे.
