यवत, ता. 07 : शेतजमिनीच्या वादातून लोखंडी खांब रोवण्याच्या कारणावरून काका-पुतण्याच्या कुटुंबात वाद होऊन हाणामारी झाल्याची घटना घडली. एकेरीवाडी (ता. दौंड) येथे गुरुवारी (ता. 05) दुपारी बाराच्या सुमारास ही घटना घडली.
सरुबाई किसन टकले (वय 45, व्यवसाय अंगनवाडी सेवीका मदतनीस रा. ऐकेरीवाडी ता. दौंड) असे मारहाण झालेल्या महिलेचे नाव असून या घटनेत त्यांची मुलगी सारीका पांढरे हिलाही धक्काबुक्की व शिवीगाळ केल्याचा आरोप करण्यात आला आहे. सरूबाई यांनी दिलेल्या तक्रारीनुसार हनुमंत दत्तात्रय टकले, अंजली हनुमंत टकले व त्याच्या सोबत असणारे अनोळखी 4 महीला (नाव पत्ता माहीत नाही) या सहा जणांवर गुन्हा दाखल करण्यात आला आहे. या
पोलिसांनी दिलेल्या माहितीनुसार, गुरुवारी (ता. 05) दुपारी बाराच्या सुमारास सरुबाई टकले यांच्या शेतात त्यांचे पुतणे हनुमंत टकले आणि त्यांची पत्नी अंजली टकले हे मजूर घेऊन लोखंडी खांब रोवत होते. याबाबत सरुबाई यांनी विचारणा केली असता, संबंधित जागा आपली असल्याचे सांगत हनुमंत यांनी वाद घातल्याचा आरोप आहे.
यानंतर हनुमंत यांनी शिवीगाळ व दमदाटी करून हातातील कुऱ्हाडीच्या दांड्याने सरुबाई यांच्या पाठीवर, कंबरेवर आणि पायावर मारहाण केल्याचे फिर्यादीत म्हटले आहे. तसेच अंजली यांनी हातातील ऊस तोडण्याच्या कोयत्याने मारण्याचा प्रयत्न केला. त्यावेळी सरुबाई यांनी बचावासाठी डावा हात पुढे केल्याने त्यांच्या करंगळीला दुखापत झाल्याचे तक्रारीत नमूद आहे.
या वेळी मजुरीसाठी आलेल्या चार अनोळखी महिलांनी सरुबाई यांना धक्काबुक्की केली. आईला सोडविण्यासाठी आलेल्या मुलगी सारीका पांढरे हिलाही या महिलांनी धक्काबुक्की करून शिवीगाळ व दमदाटी केल्याचा आरोप आहे. दरम्यान, भांडण सोडविण्यासाठी आलेल्या नातेवाइकांनी दोन्ही बाजूंना शांत केले. या गोंधळात मुलीच्या गळ्यातील मंगळसूत्र आणि पायातील जोडवे हरवल्याचेही फिर्यादीत नमूद करण्यात आले आहे.
दरम्यान, या प्रकरणी सरुबाई टकले यांच्या फिर्यादीवरून सहा जणांविरुद्ध गुन्हा दाखल करण्यात आला आहे. तपास यवत पोलीस ठाण्याचे पोलीस उपनिरीक्षक भोसले करीत आहेत.
