दौंड, (पुणे) : दौंड रेल्वे स्टेशनकडे जाणाऱ्या एका कंपनी कामगाराला लिफ्ट देण्याच्या बहाण्याने दुचाकीवर बसवून, एका अंधाऱ्या ठिकाणी नेऊन लाथाबुक्क्यांनी मारहाण करत लुटल्याची धक्कादायक घटना घडली आहे. या घटनेत अज्ञात तीन चोरट्यांनी तरुणाचा मोबाईल, रोख रक्कम आणि महत्त्वाची कागदपत्रे पळवली.
प्रशांत पांडुरंग हरमकार (वय 23, रा. कुरकुंभ एमआयडीसी, मूळ रा. खामगाव, जि. बुलढाणा) असे मारहाण झालेल्या तरुणाचे नाव आहे. तरुणाने दिलेल्या तक्रारीनुसार अज्ञात तिघांवर दौंड पोलीस ठाण्यात गुन्हा दाखल करण्यात आला आहे. ही घटना 13 एप्रिल 2026 रोजी रात्री 12 वाजण्याच्या सुमारास दौंडमधील ‘गोल राऊंड’ परिसरात घडली. तर मंगळवारी (ता. 23 जूनला) गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी प्रशांत हरमकार हा कुरकुंभ एमआयडीसीमधील कंपनीत नोकरी करतो. कंपनीतून तीन महिन्यांची सुट्टी मिळाल्याने तो गावी जाण्यासाठी निघाला होता. 13 एप्रिलला 12 वाजण्याच्या सुमारास कुरकुंभ येथून पायी चालत दौंड कॉर्डलाईन रेल्वे स्टेशनकडे निघाला होता. यावेळी पाठीमागून एका मोटारसायकलवरून दोन अज्ञात इसम आले आणि त्यांनी प्रशांतला गाठले. “तुला कुठे जायचे आहे? आम्ही तुला बस गाडीवर सोडतो,” प्रशांतने रेल्वे स्टेशनला जायचे असल्याचे सांगताच, चल तुला सोडतो,” असे म्हणून त्यांनी प्रशांतला विश्वासात घेऊन दुचाकीवर बसवले.
दोन्ही आरोपींनी एका सुनसान अंधाऱ्या ठिकाणी नेऊन गाडी थांबवली. त्या ठिकाणी आधीच एक तिसरा साथीदार दुसरी दुचाकी घेऊन दबा धरून बसला होता. प्रशांत गाडीवरून उतरताच त्या तिसऱ्याने पाठीमागून त्याचे हात पकडले. तर लिफ्ट देऊन आणलेल्या एकाने थेट जमिनीवरील मोठा दगड उचलला आणि “तुझ्याकडील पैसे आणि मोबाईल दे, नाहीतर लय मारील अशी धमकी दिली. प्रशांतने घाबरून ओरडण्याचा प्रयत्न केला असता, त्याला कानाखाली मारत पोटात लाथाबुक्क्यांनी मारहाण केली.
दरम्यान, चोरट्यांनी प्रशांतच्या खिशातून मोबाईल आणि पाकिटातील रोख रक्कम, आधारकार्ड, पॅनकार्ड, मतदानकार्ड आणि एसबीआयचे एटीएम कार्ड जबरदस्तीने काढून घेतले. लूटमार केल्यानंतर तिन्ही चोरटे त्यांच्या दोन मोटारसायकलवरून पसार झाले. तो तशाच अवस्थेत पायी चालत रेल्वे स्टेशनवर गेला आणि तेथून थेट बुलढाणा येथील आपल्या मूळ गावी निघून गेला.
दरम्यान, सुट्टी संपवून तो पुन्हा कुरकुंभ येथील कंपनीत कामावर हजर झाला, त्यानंतर त्याने मंगळवारी रात्री दौंड पोलीस ठाणे गाठून ही तक्रार दिली आहे. तपास पोलीस हवालदार आसिफ सय्यद करीत आहेत.
