लोणी काळभोर, ता. २४ : पतीच्या मासिक विधीसाठी घराबाहेर गेलेल्या एका विधवा महिलेच्या घरात अज्ञात चोरट्यांनी दिवसाढवळ्या हात साफ करत सोन्याचे दागिने आणि रोख रक्कम असा एकूण १ लाख ४९ हजार रुपयांचा ऐवज लंपास केल्याची घटना घडली आहे. हि घटना लोणी काळभोर (ता. हवेली) ग्रामपंचायत हद्दीतील माळीमळा परिसरात घडली आहे.
या प्रकरणी रेखा कुमार पेटे (वय ३८, रा. माळीमळा, शौर्यवाड्यासमोर, लोणी काळभोर) यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, रेखा पेटे या मुलगा तुषार आणि मुलगी कृती यांच्यासह वास्तव्यास असून मजुरी करून कुटुंबाचा उदरनिर्वाह करतात. त्यांचे पती कुमार राम पेटे यांचे नोव्हेंबर २०२५ मध्ये निधन झाल्यानंतर त्या आई सुमन कांबळे यांच्या शेजारी राहू लागल्या आहेत.
दरम्यान,पतीच्या मासिक विधीनिमित्त रेखा पेटे या मुलासह रामटेकडी येथील अंधशाळा परिसरातील त्यांच्या मालकीच्या घरी गेल्या होत्या. शेजारी आई राहत असल्याने घराला कुलूप लावले नव्हते. सायंकाळी सुमारे पाचच्या सुमारास घरी परतल्यानंतर घरातील साहित्य अस्ताव्यस्त पडलेले दिसून आले. कपाटातील लॉकर तपासले असता सोन्याचे दागिने आणि रोख रक्कम गायब असल्याचे त्यांच्या निदर्शनास आले.
दरम्यान, चोरीस गेलेल्या मालमत्तेमध्ये सोन्याचे टॉप व झुबे, दोन गंठण, सोन्याची अंगठी आणि २३ हजार रुपयांची रोख रक्कम असा एकूण १ लाख ४९ हजार रुपयांचा ऐवज असल्याचे फिर्यादीत नमूद करण्यात आले आहे. सकाळी ८ ते सायंकाळी ५ या वेळेत अज्ञात चोरट्यांनी घरात प्रवेश करून कपाट फोडत चोरी केल्याचा संशय व्यक्त करण्यात आला असून, लोणी काळभोर पोलीस पुढील तपास करीत आहेत.
