पुणे: मावळ तालुक्यात सुरू असलेल्या मुसळधार पावसाचा फटका कार्ला येथील श्री एकविरा देवी मंदिराला बसला आहे. अतिवृष्टीमुळे मंदिराकडे जाणाऱ्या पायऱ्यांलगत दोन ठिकाणी रस्ता खचल्याने भाविकांच्या सुरक्षिततेच्या दृष्टीने मंदिर तीन दिवसांसाठी बंद ठेवण्याचा निर्णय घेण्यात आला आहे.
श्री एकविरा देवस्थान ट्रस्टने दिलेल्या माहितीनुसार, ११ ते १३ जुलै या कालावधीत मंदिर दर्शनासाठी पूर्णपणे बंद राहणार आहे. या काळात कोणत्याही भाविकाला गडावर प्रवेश दिला जाणार नाही. तसेच गडाकडे जाणाऱ्या मुख्य घाटमार्गावर सर्व प्रकारच्या वाहनांच्या प्रवेशावरही बंदी घालण्यात आली आहे.
कार्ला गडावर दररोज हजारो भाविक दर्शनासाठी येतात. मात्र, गेल्या काही दिवसांपासून सुरू असलेल्या संततधार पावसामुळे डोंगराचा काही भाग आणि पायऱ्यांच्या बाजूचा रस्ता दोन ठिकाणी खचला आहे. त्यामुळे आणखी दरड कोसळण्याचा किंवा रस्ता अधिक खचण्याचा धोका निर्माण झाला आहे.
ही परिस्थिती लक्षात घेऊन देवस्थान ट्रस्ट आणि स्थानिक प्रशासनाने तातडीने दुरुस्तीचे काम सुरू केले आहे. दुरुस्तीच्या ठिकाणी सुरक्षा व्यवस्था वाढविण्यात आली असून घाटमार्गावर बॅरिकेड्स लावण्यात आले आहेत. तसेच पोलीस आणि सुरक्षा रक्षकांचीही नियुक्ती करण्यात आली आहे.
देवस्थान ट्रस्टने भाविकांना या तीन दिवसांत मंदिरात येण्याचे टाळावे, तसेच ही माहिती इतर भाविक आणि नातेवाईकांपर्यंत पोहोचवावी, असे आवाहन केले आहे. दुरुस्तीचे काम पूर्ण झाल्यानंतर आणि परिस्थिती सुरक्षित झाल्यानंतरच मंदिर दर्शनासाठी पुन्हा खुले करण्यात येणार असल्याचे ट्रस्टने स्पष्ट केले आहे.
