पुणे : पुणे महानगरपालिकेत मोठ्या पदावर नोकरी लावून देण्याचे आमिष दाखवत एका तरुणाची 15 लाख रुपयांची फसवणूक केल्याचा प्रकार समोर आला आहे. कनिष्ठ अभियंता, वरिष्ठ अभियंता तसेच उपायुक्त पद मिळवून देण्याचे आश्वासन देत बनावट कागदपत्रांच्या आधारे हा गंडा घातल्याचा आरोप आहे. या प्रकरणी पर्वती पोलिसांनी एका व्यक्तीला अटक केली आहे.
शिवानंद बाळासाहेब पाटील (वय 45, रा. कर्वेनगर, पुणे) असे अटक करण्यात आलेल्या आरोपीचे नाव आहे. धायरी परिसरातील 35 वर्षीय तरुणाने याबाबत पर्वती पोलीस ठाण्यात तक्रार दिली होती.
तक्रारीनुसार, शिवानंद पाटील याने स्वतःची ओळख ‘क्रीडा अधीक्षक’ म्हणून करून दिली. तसेच मंत्रालयातील काही वरिष्ठ अधिकाऱ्यांशी आपले जवळचे संबंध असल्याचे सांगून तक्रारदाराचा विश्वास संपादन केला. महापालिकेत चांगल्या पदावर नोकरी लावून देण्याचे सांगत त्याच्याकडून पैसे घेतल्याचा आरोप आहे.
ही फसवणूक डिसेंबर 2023 ते 12 ऑगस्ट 2026 या कालावधीत झाल्याचे पोलिसांनी सांगितले. या काळात तक्रारदाराकडून वेगवेगळ्या टप्प्यांत एकूण 15 लाख रुपये घेतल्याची माहिती आहे. पैसे दिल्यानंतर नोकरी मिळेल, अशी अपेक्षा तक्रारदाराला होती.
फसवणूक लपवण्यासाठी आरोपीने पुणे महापालिकेच्या नावाने बनावट नियुक्तीपत्र, बदलीचे आदेश आणि ओळखपत्र तयार करून दिल्याचे तपासात समोर आले आहे. या कागदपत्रांवर बनावट स्वाक्षऱ्या आणि शिक्के वापरण्यात आल्याचा आरोप आहे. मात्र, बराच काळ उलटल्यानंतरही नोकरी मिळाली नाही आणि कागदपत्रांबाबत संशय निर्माण झाल्याने तरुणाने पोलिसांकडे धाव घेतली.
तक्रार दाखल झाल्यानंतर पर्वती पोलिसांनी तपास करत शिवानंद पाटील याला अटक केली. पोलीस निरीक्षक (गुन्हे) कविता हिवरकर या प्रकरणाचा पुढील तपास करत आहेत.
