बारामती : पतीच्या जाचाला कंटाळून त्याला बेशुद्ध करून जिवंत पुरण्याचा प्रयत्न केल्याचा धक्कादायक प्रकार बारामतीत समोर आला आहे. या प्रकरणी पोलिसांनी शर्मिला जगताप हिला अटक केली आहे. पोलीस चौकशीत शर्मिलाने पतीकडून आपल्याला आणि मुलांना मारहाण होत असल्याचा आरोप केला आहे.
शर्मिलाने पोलिसांना सांगितले की, तिचा पती प्रवीण जगताप तिला दररोज मारहाण करत होता. तसेच तिला नोकरी करण्यासही परवानगी देत नव्हता. शर्मिलाने बी. फार्मसीचे शिक्षण घेतले आहे. मात्र, पतीच्या सततच्या त्रासामुळे तिला नैराश्यात गेल्याचे तिने सांगितले. “पतीने माझी अवस्था मोलकरणीसारखी करून ठेवली होती,” असा आरोपही शर्मिलाने केला. प्रवीण मुलांनाही सतत मारहाण करत असल्याचे तिने पोलिसांना सांगितले.
बारामतीतील एका उच्चभ्रू वस्तीतील फ्लॅटमध्ये प्रवीण आणि शर्मिला राहत होते. दोघांमध्ये गेल्या काही काळापासून वाद सुरू होता. या वादातून शर्मिलाने पतीला ठार करण्याचा कट रचल्याचे पोलिस तपासात समोर आले आहे.
शर्मिलाला वृक्षलागवडीचा छंद होता. त्यामुळे तिला फ्लॅटच्या बाल्कनीत बगीचा तयार करायचा होता. त्यासाठी तिने बाल्कनीतील एका भागात चौकोनी कट्टा तयार केला होता. शर्मिलाने पतीला बेशुद्ध होण्याचे औषध दिल्यानंतर त्याच्यावर क्रिकेटच्या बॅटने हल्ला केला. त्यानंतर प्रवीणचा मृत्यू झाल्याचे समजून तिने त्याला बाल्कनीतील कट्ट्यात ठेवले आणि त्यावर माती टाकली.
यानंतर कट्ट्यावर टाइल्स बसवण्यासाठी तिने एका मजुराला बोलावले. मात्र, या प्रकारामुळे मजुराला संशय आला. त्याने तातडीने बारामती पोलिसांना याची माहिती दिली.
माहिती मिळताच पोलिसांनी घटनास्थळी धाव घेतली. कट्टा उघडून पाहिल्यानंतर त्यामध्ये बेशुद्ध अवस्थेत प्रवीण आढळून आला. पोलिसांनी त्याला बाहेर काढून तातडीने रुग्णालयात दाखल केले.
या प्रकरणी पोलिसांनी शर्मिला जगतापला अटक केली असून, पतीवर हल्ला करण्यामागील नेमके कारण आणि संपूर्ण घटनेचा पुढील तपास सुरू आहे.
