उरुळी कांचन, (पुणे) : कोयत्याचा धाक दाखवून किराणा व्यावसायिकाकडे खंडणी मागितल्याचा प्रकार उघडकीस आला आहे. नकार देताच दुकानातील साहित्याची तोडफोड करून नुकसान केल्याप्रकरणी एकावर उरुळी कांचन पोलीस ठाण्यात गुन्हा दाखल करून आरोपीला तात्काळ अटक करण्यात आली आहे. ही घटना मंगळवारी (ता. 04) सोरतापवाडी (ता. हवेली) गावचे हद्दीततील वायकरवस्ती येथील परिसरात घडली.
तेजस नितीन हरिश्चंद्रे (वय 26 वर्ष रा. कॅनल शेजारी, माळवाडी कुंजीरवाडी ता. हवेली) असे खंडणी मागणाऱ्या आरोपीचे नाव आहे. याबाबत प्रकाश संतोष गुप्ता (वय 64, धंदा किराणा दुकान रा. सोरतापवाडी ता. हवेली) यांनी उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, प्रकाश गुप्ता हे वायकरवस्ती येथे ‘नमस्वी’ नावाचे किराणा दुकान चालवतात. मंगळवारी सायंकाळी साडेचार वाजण्याच्या सुमारास प्रकाश गुप्ता दुकानात असताना, आरोपी तेजस हरिश्चंद्रे हा दुकानात शिरला. त्याने हातात असलेला धारदार लोखंडी कोयता हवेत दाखवून प्रकाश गुप्ता यांना जीवे मारण्याची धमकी दिली आणि पैशांची (खंडणीची) मागणी केली.
View this post on Instagram
गुप्ता यांनी पैसे देण्यास नकार दिला असता, आरोपी तेजस हरिश्चंद्रे याने अश्लील भाषेत शिवीगाळ केली. तसेच, हातात असलेल्या कोयत्याने दुकानातील विक्रीसाठी ठेवलेल्या साहित्याची तोडफोड केली. या घटनेनंतर घाबरलेल्या प्रकाश गुप्ता यांनी तातडीने उरुळी कांचन पोलीस ठाण्यात तक्रार दिली.
दरम्यान, घटनेचे गांभीर्य ओळखून उरुळी कांचन पोलिसांनी तातडीने आरोपीचा शोध घेऊन त्याला कुंजीरवाडी येथून अटक केली. आरोपीविरुद्ध भारतीय न्याय संहिता (BNS) २०२३ चे कलम ३०८(३), ३२४(४), ३५१(२), ३५१(३), ३५२ तसेच भारतीय शस्त्र अधिनियम १९५९ चे कलम ४ व २५ अंतर्गत गुन्हा दाखल करण्यात आला आहे.
