शिक्रापूर, ता. 07 : महाराष्ट्र आणि मध्यप्रदेशात घरफोडीच्या तब्बल 24 गुन्ह्यांची नोंद असलेल्या सराईत चोरट्याला स्थानिक गुन्हे शाखा आणि शिक्रापूर पोलिसांनी अमरावती जिल्ह्यातून ताब्यात घेतले.
दीपक भीमराव दांडगे (वय-25, रा. घुग्री, ता. भैसदेही, जि. बैतूल, मध्यप्रदेश; सध्या रा. कविठा, ता. अचलपूर, जि. अमरावती) असे अटक करण्यात आलेल्या आरोपीचे नाव आहे. त्याच्याकडून सुमारे 16 तोळे सोन्याचे दागिने आणि मोटारसायकल असा एकूण 24 लाख 30 हजार रुपयांचा मुद्देमाल जप्त करण्यात आला आहे.
शिक्रापूर व शिरूर परिसरातील घरफोडीच्या घटनांचा तपास सुरू असताना पुणे ग्रामीणचे पोलीस अधीक्षक संदीपसिंह गिल यांनी मालमत्तेविषयक गुन्हे उघडकीस आणण्याच्या सूचना तपास पथकांना दिल्या होत्या. त्यानुसार पोलिसांनी घटनास्थळ, गुन्ह्याची वेळ, आरोपीची कार्यपद्धती तसेच परिसरातील सीसीटीव्ही फुटेजचा बारकाईने अभ्यास केला. तांत्रिक विश्लेषणातून मिळालेल्या माहितीच्या आधारे आरोपीचा माग काढण्यात आला.
दरम्यान, आरोपी अमरावती जिल्ह्यातील कविठा येथे बहिणीकडे राहत असल्याची गोपनीय माहिती पोलिसांना मिळाली. त्यानुसार स्थानिक गुन्हे शाखेचे पथक आणि शिक्रापूर पोलिसांनी कविठा येथे सापळा रचून दीपक दांडगे याला ताब्यात घेतले.
पोलिसी चौकशीत त्याने शिक्रापूर व शिरूर परिसरात घरफोड्या केल्याची कबुली दिली. त्याच्या कबुलीनंतर शिक्रापूर पोलीस ठाण्यातील गुन्हा आणि शिरूर पोलीस ठाण्यातील असे तीन घरफोडीचे गुन्हे उघडकीस आले. आरोपीकडून चोरीचा सोन्याचा ऐवज व मोटारसायकल हस्तगत करण्यात आली.
दरम्यान, दीपक दांडगे याच्याविरुद्ध यापूर्वी महाराष्ट्र आणि मध्यप्रदेश राज्यांत तब्बल 24 घरफोडीचे गुन्हे दाखल असल्याचे पोलिसांनी सांगितले. त्याला न्यायालयात हजर करण्यात आले असून सध्या तो शिक्रापूर पोलिसांच्या कोठडीत आहे. या कारवाईमुळे शिक्रापूर व शिरूर परिसरातील घरफोडीच्या आणखी घटनांचा छडा लागण्याची शक्यता असून, पोलिसांकडून पुढील तपास सुरू आहे.
सदरची कामगिरी यांचे मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, शिक्रापुर पोलीस ठाण्याचे पोलीस निरीक्षक चंद्रशेखर यादव, सहायक पोलीस निरीक्षक राहुल देशमुख, स्थानिक गुन्हे शाखेचे पोलीस उपनिरीक्षक महेश डोंगरे, सहायक फौजदार संजय पड्याळ, पोलीस हवालदार तुषार पंदारे, जनार्दन शेळके, संजू जाधव, राजु मोमीन, विकास पाटील, सागर धुमाळ व शिक्रापुर पोलीस ठाण्यातील पोलीस उपनिरीक्षक उमाकांत कुंजीर, पोलीस अंमलदार धनंजय थेऊरकर, अमोल दांडगे, शिवाजी चितारे, रोहिदास पारखे, अमोल नलगे, मच्छिद्र निचित, नारायण वाळके, राम जाधव, भारत भोसले, अस्मिता जोंधळे यांनी केली असन सदर गन्हयाचा पढील तपास शिक्रापर पोलीस करत आहेत.
