पुणे : पुण्यातील बहुप्रतिक्षित हिंजवडी ते शिवाजीनगर मेट्रो प्रकल्पाच्या पहिल्या टप्प्याला मेट्रो रेल्वे सुरक्षा आयुक्तांकडून (CMRS) मंजुरी मिळून 2 आठवडे उलटले आहेत. माण-हिंजवडी ते शिवाजीनगर या 12 किलोमीटरच्या मार्गाला प्रवासी सेवेसाठी हिरवा कंदील मिळाला असला, तरी प्रत्यक्ष मेट्रो सुरू होण्याची तारीख अद्याप जाहीर झालेली नाही.
हिंजवडी परिसरातील आयटी कंपन्यांमध्ये काम करणाऱ्या हजारो कर्मचाऱ्यांना दररोज वाहतूक कोंडीचा सामना करावा लागतो. त्यामुळे मेट्रो सेवा लवकर सुरू व्हावी, अशी अपेक्षा पुणेकरांकडून व्यक्त केली जात आहे. मात्र, मंजुरी मिळूनही उद्घाटन रखडल्याने प्रवाशांची प्रतीक्षा वाढली आहे.
यापूर्वी पुण्यातील इतर मेट्रो मार्गांना CMRS ची परवानगी मिळाल्यानंतर काही दिवसांतच सेवा सुरू करण्यात आली होती. जिल्हा न्यायालय ते स्वारगेट मार्गावर मंजुरीनंतर अवघ्या 5 दिवसांत मेट्रो धावली होती. तसेच वनाझ ते गरवारे कॉलेज, पिंपरी ते फुगेवाडी आणि गरवारे कॉलेज ते रुबी हॉल क्लिनिक या मार्गांवर 6 दिवसांच्या आत सेवा सुरू झाली होती. रुबी हॉल क्लिनिक ते रामवाडी मार्गासाठी मात्र 15 दिवसांचा कालावधी लागला होता.
मात्र, हिंजवडी मेट्रोच्या बाबतीत मंजुरी मिळून 14 दिवस झाले तरी PMRDA आणि पुणे आयटी सिटी मेट्रोकडून उद्घाटनाच्या तारखेबाबत कोणतीही अधिकृत माहिती देण्यात आलेली नाही.
पुण्यातील आतापर्यंतच्या अनेक मेट्रो मार्गांचे उद्घाटन पंतप्रधान नरेंद्र मोदी यांच्या हस्ते झाले आहे. त्यामुळे हिंजवडी मेट्रोचे उद्घाटनही पंतप्रधानांच्या उपलब्ध वेळेनुसार पुढे ढकलले जात आहे का, अशी चर्चा सुरू झाली आहे.
दरम्यान, 15 ऑगस्ट स्वातंत्र्यदिनाच्या निमित्ताने मेट्रो सेवा सुरू करण्याचा विचार असल्याची शक्यता व्यक्त केली जात आहे. मात्र, जर उद्घाटन आणखी लांबले, तर CMRS मंजुरीनंतर सर्वाधिक विलंबाने सुरू होणाऱ्या मेट्रो मार्गांमध्ये हिंजवडी मेट्रोचा समावेश होण्याची शक्यता आहे.
