मुंबई: सुनेच्या नावावर घर आहे म्हणून ती सासूला त्या घरातून बाहेर काढू शकत नाही, असा महत्त्वपूर्ण निर्णय हिमाचल प्रदेश उच्च न्यायालयाने दिला आहे. घराची मालकी कोणाच्या नावावर आहे, यापेक्षा त्या घरात कुटुंब एकत्र राहत होते का, याला अधिक महत्त्व असल्याचे न्यायालयाने स्पष्ट केले आहे.
न्यायालयाने सांगितले की, सून स्वतःच्या पैशातून घर खरेदी केलेले असले तरी, त्या घरात आधीपासून राहत असलेल्या सासूचा निवासाचा अधिकार संपत नाही. सासू आणि सुनेमध्ये मतभेद असले तरी, सुनेला सासूला घराबाहेर काढण्याचा अधिकार नाही.
हे प्रकरण हिमाचल प्रदेशातील मंडी जिल्ह्यातील रामनगर येथील आहे. मनजीत कौर या महिलेने आपल्या हक्कासाठी न्यायालयात धाव घेतली होती. त्यांच्या मुलाचे लग्न 2013 मध्ये झाले होते. त्यानंतर संपूर्ण कुटुंब एकाच घरात राहत होते.
मात्र, 2025 मध्ये कुटुंबातील वाद वाढले. त्यानंतर सून सुरभी बेदी हिने हे घर स्वतःच्या कमाईतून बांधले असल्याचा दावा केला आणि घरावर आपला पूर्ण अधिकार असल्याचे सांगितले. तिने सासूला घराबाहेर काढून त्या ठिकाणी भाडेकरू ठेवला. यानंतर सासूने कौटुंबिक हिंसाचार कायद्याअंतर्गत न्यायालयात अर्ज दाखल करून घरात राहण्याचा अधिकार मागितला. या प्रकरणावर सुनावणी करताना न्यायमूर्ती राकेश कैथला यांच्या खंडपीठाने सासूच्या बाजूने निर्णय दिला.
न्यायालयाने स्पष्ट केले की, घर पती, सासू किंवा सुनेच्या नावावर असणे हा एकमेव निकष नाही. जर कुटुंब त्या घरात एकत्र राहत असेल, तर ते सामायिक निवासस्थान मानले जाऊ शकते.
