पुणे, ता. 23 : पुणे जिल्ह्याच्या ऐतिहासिक आणि सांस्कृतिक वैभवाचे प्रतीक असलेल्या किल्ले सिंहगडाच्या जतन व दुरुस्तीच्या कामांसाठी शासनाकडून 9 कोटी रुपयांचा निधी मंजूर करण्यात आल्याची माहिती हवेली पंचायत समितीचे सभापती युवराज हिरामण काकडे यांनी दिली. या निधीमुळे सिंहगडाच्या संवर्धनाच्या कामांना गती मिळण्याची अपेक्षा असून, हवेलीच्या ऐतिहासिक वैभवातही भर पडणार असल्याचे त्यांनी सांगितले.
छत्रपती शिवाजी महाराजांच्या इतिहासात सिंहगडाला अनन्यसाधारण महत्त्व आहे. पूर्वी कोंढाणा म्हणून ओळखला जाणारा हा किल्ला1670 च्या सिंहगडाच्या युद्धाचा साक्षीदार आहे. महाराष्ट्र पर्यटन विभागानेही सिंहगडाला मराठा इतिहास, शौर्य आणि बलिदानाची साक्ष देणारे महत्त्वपूर्ण ऐतिहासिक स्थळ म्हणून नमूद केले आहे.
मंजूर निधीतून किल्ल्यावरील ऐतिहासिक वास्तू, तटबंदी आणि स्मारकांच्या जतन, संवर्धन व दुरुस्तीची कामे करण्यास चालना मिळणार आहे. तसेच पर्यटक आणि शिवप्रेमींच्या दृष्टीने आवश्यक सुविधांच्या विकासालाही यामुळे बळ मिळण्याची अपेक्षा आहे.
किल्ले सिंहगड परिसरातील छत्रपती राजाराम महाराज आणि नरवीर तानाजी मालुसरे यांच्या स्मृतिस्थळांकडेही अधिक पर्यटक व शिवप्रेमी आकर्षित होतील, अशी अपेक्षा व्यक्त करण्यात येत आहे. ऐतिहासिक वास्तूंचे संवर्धन करताना त्यांचे मूळ स्वरूप आणि ऐतिहासिक महत्त्व जपणे महत्त्वाचे असल्याने शासनाच्या संवर्धनाच्या धोरणालाही यामुळे चालना मिळणार आहे.
दरम्यान, राज्य शासनाने गड-किल्ले, प्राचीन मंदिरे आणि ऐतिहासिक स्मारकांच्या संवर्धनासाठी जिल्हा वार्षिक योजनेतील 3 टक्के निधीची तरतूद 2026-27 पर्यंत कायम ठेवली असून, विविध संवर्धनाच्या कामांना गती देण्याचे निर्देश सांस्कृतिक कार्यमंत्री ॲड. आशिष शेलार यांनी दिले आहेत.
सिंहगडाच्या जतन व दुरुस्तीसाठी निधी मंजूर झाल्याबद्दल मुख्यमंत्री देवेंद्र फडणवीस, उपमुख्यमंत्री सुनेत्रा पवार व एकनाथ शिंदे, सांस्कृतिक कार्यमंत्री ॲड. आशिष शेलार, आमदार भीमराव तापकीर, आमदार ज्ञानेश्वर कटके आणि महायुती सरकारचे हवेली पंचायत समितीचे सभापती युवराज हिरामण काकडे यांनी हवेली तालुक्याच्या वतीने आभार मानले.
