धुळे : जिल्ह्यात पावसाने दडी मारल्यामुळे खरीप हंगामातील पिके जळून खाक झाली आहेत. जिल्ह्यात केवळ 65% पाऊस झाल्याने शेतकरी वर्ग मोठ्या संकटात सापडला आहे. धुळे जिल्हा तत्काळ दुष्काळग्रस्त जाहीर करून मदत देण्याची मागणी शेतकरी व स्थानिक लोकप्रतिनिधी करत आहेत. मात्र, अशा अत्यंत बिकट परिस्थितीत सत्ताधारी व भाजप नेत्यांच्या वाढदिवसानिमित्त आयोजित मनोरंजनाच्या कार्यक्रमांवरून मोठा वाद निर्माण झाला आहे.
भाजप नेते आणि मंत्री जयकुमार रावल यांच्या मुलाच्या वाढदिवसानिमित्त लावणी कार्यक्रमाचे आयोजन करण्यात आले होते. तसेच भाजपचे माजी आमदार कुणाल पाटील यांच्या वाढदिवसाचे औचित्य साधून प्रसिद्ध नृत्यांगना गौतमी पाटील यांच्या नृत्याचा कार्यक्रम घडवून आणला गेला. एका बाजूला बळीराजा पाण्यासाठी आणि मदतीसाठी आक्रोश करत असताना, दुसरीकडे अशा प्रकारे कोट्यवधी रुपयांचा अपव्यय करून जल्लोष साजरा केला जात असल्याने नागरिकांमधून प्रचंड संताप व्यक्त होत आहे.
या गंभीर मुद्द्यावरून विरोधकांनी महायुती सरकार व स्थानिक नेत्यांवर घणाघाती टीका केली आहे. शिवसेना (उद्धव बाळासाहेब ठाकरे) गटाचे धुळे जिल्हाध्यक्ष नानाभाऊ सोनवणे, किसान सभेचे हिरालाल परदेशी आणि माजी आमदार अनिल गोटे यांनी या प्रकाराचा तीव्र शब्दांत निषेध केला. “शेतकऱ्यांच्या जखमेवर मीठ चोळणारे हे कृत्य असून लोकप्रतिनिधींना संवेदनशीलतेचा पूर्ण विसर पडला आहे,” असा आरोप त्यांनी केला.
शेतकरी पावसाअभावी आणि पिकांच्या नुकसानीमुळे होरपळून निघत असताना नेत्याकडून वाढदिवसावर कोट्यवधीचा खर्च करणे कितपत योग्य आहे, असा सवाल उपस्थित केला जात आहे.
