पुणे, ता. २३ : येत्या २५ सप्टेंबर रोजी अनंत चतुर्दशीला गणपती बाप्पाला निरोप दिला जाणार आहे. पुण्यातील गणेश विसर्जन मिरवणुकीकडे दरवर्षी मोठ्या उत्सुकतेने पाहिले जाते. यंदा विसर्जन मिरवणुकीदरम्यान होणारी गर्दी आणि वाहतूक लक्षात घेऊन पुणे पोलिसांनी विविध उपाययोजना केल्या आहेत. पुण्याचे पोलीस आयुक्त अमितेश कुमार यांनी बुधवारी याबाबत प्रसारमाध्यमांना माहिती दिली.
यंदा गणेश विसर्जनासाठी शहरात मोठा पोलिस बंदोबस्त तैनात करण्यात आला असून, सुमारे १० हजार अधिकारी आणि कर्मचारी मिरवणुकीदरम्यान रस्त्यावर असतील. लक्ष्मी रस्ता, टिळक रस्ता, कुमठेकर रस्ता आणि केळकर रस्ता या चार प्रमुख मार्गांवर मिळून ६३८ गणेश मंडळांच्या विसर्जन मिरवणुका निघणार आहेत. नागरिकांसाठी शहरात २६ ठिकाणी वाहनतळांची व्यवस्था करण्यात आली आहे.
गर्दीवर लक्ष ठेवण्यासाठी आणि परिस्थितीवर नियंत्रण ठेवण्यासाठी सीसीटीव्ही तंत्रज्ञानाचा वापर करण्यात येणार असल्याची माहिती आयुक्त अमितेश कुमार यांनी दिली. यासोबतच गणेश विसर्जन मिरवणुकीशी संबंधित महत्त्वाची माहिती पुणेकरांना एका क्लिकवर उपलब्ध करून देण्यात येणार आहे.
पुणे पोलिसांकडून diversion.Punepolice.Gov.in ही विशेष ऑनलाइन सुविधा उपलब्ध करून देण्यात येणार आहे. या संकेतस्थळावर वाहतूक बदल, प्रमुख गणपतींच्या मिरवणुकीचे मार्ग तसेच इतर आवश्यक माहिती मिळणार आहे. मागील वर्षी दोन कोटी सात लाख लोकांनी या संकेतस्थळाचा वापर केल्याची माहिती देण्यात आली.
या ऑनलाइन सुविधेवर मानाच्या प्रमुख गणपतींसह शहरातील प्रसिद्ध गणपतींच्या विसर्जन मिरवणुका कोणत्या मार्गाने आणि कोणत्या दिशेने पुढे जात आहेत, याची सद्यस्थितीतील माहिती मिळणार आहे. तसेच एखादी मिरवणूक सध्या नेमकी कोणत्या ठिकाणी आहे, याची माहिती नागरिकांना मिळू शकणार आहे. त्यामुळे नागरिकांना आपल्या वेळेनुसार इच्छित ठिकाणी गणपतीचे दर्शन घेण्याचे नियोजन करता येईल.
विसर्जन मिरवणुकीचे पुढील आणि शेवटचे टोक कोणत्या ठिकाणी आहे, याची माहितीही उपलब्ध होणार आहे. त्यावरून कोणते रस्ते केव्हा बंद किंवा सुरू होणार आहेत, याचा अंदाज घेऊन नागरिकांना आपल्या प्रवासाचे नियोजन करता येणार आहे. बंद केलेले रस्ते, वाहतूक वळविण्यात आलेले पर्यायी मार्ग आणि परिस्थितीनुसार पुन्हा वाहतुकीसाठी खुले केलेले रस्ते याबाबतची अद्ययावत माहितीही संकेतस्थळावर मिळणार आहे.
याशिवाय नागरिकांना वाहन पार्क करण्यासाठी उपलब्ध असलेल्या जागांची माहिती तसेच विसर्जन मिरवणुकीत सहभागी होणाऱ्या गणेश मंडळांसाठी आवश्यक माहितीही या ऑनलाइन सुविधेद्वारे उपलब्ध करून देण्यात येणार आहे. गुगल मॅपसोबत समन्वय साधून पुणे शहरातील कोणते रस्ते केव्हा खुले किंवा बंद राहणार आहेत, याची माहिती गुगलवरही उपलब्ध करून दिली जाणार आहे.
