शिरूर : शिरूर तालुक्यातील कवठे येमाई परिसरात पोलिसांनी अमली पदार्थविरोधी कारवाई करत पोलिसांनी 61 किलो 300 ग्रॅम वजनाचा गांजा आणि इतर मुद्देमाल असा एकूण 40 लाख 66 हजार रुपयांचा मुद्देमाल जप्त केला.या कारवाईत पोपट विठ्ठल शितोळे (वय 52,रा.इचकेवाडी -कवठे येमाई,ता.शिरूर,जि.पुणे) याच्यावर कारवाई करण्यात आली आहे.
पोलिसांनी दिलेल्या माहितीनुसार,बुधवारी(ता.23) सकाळी सव्वा अकरा वाजता शिरूर ते मंचर रस्त्यावर कवठे यमाई (ता.शिरूर) येथे इचकेवस्ती परिसरात ही कारवाई करण्यात आली. आरोपीच्या राहत्या घरासमोर पार्क केलेल्या स्कॉर्पिओ क्रमांक एम.एच-12 एच.झेड-0938 या वाहनाची तपासणी केली असता, त्यामध्ये 61किलो 300 ग्रॅम वजनाचा गांजा सदृश अमली पदार्थ आढळून आला.
जप्त करण्यात आलेल्या गांजाची किंमत 30 लाख 65 हजार रुपये, तर इतर मालाची किंमत 10 लाख 1 हजार रुपये असून,असा एकूण 40 लाख 66 हजार रुपये किंमतीचा मुद्देमाल जप्त करण्यात आला असल्याचे पोलिसांनी सांगितले आहे.
पोलिसांनी आरोपी पोपट शितोळे याच्याकडे गांजा सदृश अमली पदार्थ कोठून आणला,याबाबत चौकशी केली असता त्याने समाधानकारक माहिती दिली नसल्याचेची पोलिसांनी सांगितले आहे. त्यामुळे शितोळे यांच्यावर एन.डी.पी.एस. कायद्याअंतर्गत गुन्हा दाखल करण्यात आला आहे.
या प्रकरणाचा पुढील तपास पोलिस उपनिरीक्षक गोविंद खटिंग हे करत असून,जप्त करण्यात आलेला गांजा नेमका कोठून आणण्यात आला आणि या प्रकरणामागे आणखी कोणाचा सहभाग आहे का,याचा तपास पोलिसांकडून करण्यात येत आहे.
