उरुळी कांचन, (पुणे) : घरच्या कपाटातील कपडे आणि इतर वस्तू जशाच्या तशा सुव्यवस्थित… ना कुलूप तुटलेले, ना कपाट उचकटलेले… तरीही कपाटाच्या लॉकरमधील तब्बल चालू बाजारभावाप्रमाणे तब्बल 10 लाख रुपयांचे सोन्याचे दागिने गायब झाल्याची धक्कादायक घटना उघडकीस आली आहे. उरुळी कांचन (ता. हवेली) ग्रामपंचायत हद्दीतील तळवडी चौक परिसरातील एका डॉक्टरांच्या घरी 12 जून ते 27 जून दरम्यान ही घटना घडली.
याबाबत डॉ. सुहासिनी विजय जाधव (वय-30, रा. हरीजीवन हॉस्पीटलच्या पाठीमागे तळवडी चौक उरुळी कांचन) यांनी उरुळी कांचन पोलीस ठाण्यात फिर्याद दिली आहे. याप्रकरणी अज्ञात चोरट्यावर उरुळी कांचन पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, डॉ. सुहासिनी या ‘तेजम होमिओपॅथिक क्लिनिक अँड हीलिंग सेंटर’ चालवतात. त्या पती विजय जाधव, सासू कौशल्या, सासरे आनंदराव, दीर शशांक आणि जाऊबाई नीलम जाधव यांच्यासह एकत्रित कुटुंबात राहतात. 12 जून 2026 रोजी रात्री 11 वाजण्याच्या सुमारास डॉ. सुहासिनी यांनी स्वतःचे आणि पतीचे दागिने नेहमीप्रमाणे घरातील कपाटात सुरक्षित ठेवले होते.
27 जून रोजी सकाळी एका नातेवाईकाच्या घरी कार्यक्रमाला जाण्यासाठी त्यांनी कपाट उघडले असता लॉकरमधील एकही दागिना जागेवर आढळून आला नाही. 12 जून ते 27 जून या 15 दिवसांच्या काळात घरातील कपाट आणि कपडे अत्यंत सुव्यवस्थित असल्याने घरात चोरी झाली आहे, याचा डॉ. सुहासिनी यांना संशयही आला नाही. घरामध्ये सर्वत्र शोध घेतला असता आढळून आले नाहीत.
दरम्यान, चोरी झालेल्या सोन्याच्या दागिन्यांमध्ये 20 ग्रॅमचे सोन्याचे बिस्कीट, 1 तोळे वजनाची सोन्याची पिळ्याची अंगठी, 2 तोळे वजनाचे सोन्याचे गंठण, सोन्याचा चंद्रहार, वेल असे 10 लाख रुपयांचे साडेसात तोळे सोन्याचे दागिने चोरी झाले. याबाबत उरुळी कांचन पोलीस ठाण्यात गुन्हा दाखल करण्यात आला आहे. पुढील तपास सहाय्यक पोलीस निरीक्षक पवार करत आहेत.
