लोणी काळभोर, ता. ३० : परवान्याशिवाय भरधाव वेगात आणि निष्काळजीपणे दुचाकी चालवताना समोरून येणाऱ्या टेम्पोला जोरदार धडक दिल्याने झालेल्या अपघातात मृत्यू झालेल्या १९ वर्षीय तरुणाविरोधात लोणी काळभोर पोलिसांनी तपासाअंती गुन्हा दाखल केला आहे. या घटनेमुळे वाहतूक नियमांचे पालन आणि परवान्याशिवाय वाहन चालविण्याच्या वाढत्या प्रकारांबाबत पुन्हा एकदा गंभीर प्रश्न निर्माण झाला आहे.
राकेश राहुल गायकवाड (वय १९, रा. म्हातोबाची आळंदी, ता. हवेली, जि. पुणे) असे मृत्यू झालेल्या तरुणाचे नाव आहे. पोलिसांनी दिलेल्या माहितीनुसार, राकेश गायकवाड हा ८ एप्रिल २०२६ रोजी सकाळी सुमारे ११ वाजण्याच्या सुमारास त्याच्या ताब्यातील स्प्लेंडर होंडा (एमएच-१२-एक्सपी-१८४५) या दुचाकीवरून म्हातोबाची आळंदीहून कुंजीरवाडीच्या दिशेने जात होता.
आळंदी म्हातोबाची येथील स्मशानभूमीच्या प्रवेशद्वारासमोर एका पॅनजो टेम्पोला ओव्हरटेक करण्याच्या प्रयत्नात त्याने भरधाव वेगाने, वाहतूक नियमांकडे दुर्लक्ष करून निष्काळजीपणे दुचाकी चालवली. याचवेळी समोरून येणाऱ्या महिंद्रा सुप्रो टेम्पो (एमएच-१२-एसएफ-८६२५) ला त्याची दुचाकी जोरात धडकली. या भीषण अपघातात टेम्पोचे नुकसान झाले, तर राकेश गायकवाड याचा गंभीर दुखापतीमुळे मृत्यू झाला.
या प्रकरणी लोणी काळभोर पोलीस ठाण्यात यापूर्वी अकस्मात मृत्यू नोंद (एडी क्र. ३१/२०२६) दाखल करण्यात आली होती. सहाय्यक पोलीस निरीक्षक अरुण कांतीलाल जाधव यांनी केलेल्या सखोल तपासात मृत तरुणाकडे कोणताही वैध वाहन चालविण्याचा परवाना नसल्याचे तसेच त्याच्या निष्काळजी वाहनचालकामुळेच अपघात घडल्याचे निष्पन्न झाले. त्यानुसार मृत राकेश गायकवाड याच्याविरोधात संबंधित कायद्यानुसार गुन्हा दाखल करण्यात आला असून, पुढील तपास लोणी काळभोर पोलीस करीत आहेत.
