उरुळी कांचन (पुणे) : पुणे-सोलापूर महामार्गावर भरधाव वेगाने जाणाऱ्या टेम्पो चालकाचे नियंत्रण सुटून रस्ता दुभाजक (डिव्हायडर) तोडून थेट रस्त्याच्या कडेला उभ्या असलेल्या गाड्यांना जोरात धडक दिली. या अपघातात महामार्गाच्या कडेला असलेल्या एका ऑफिससमोरील दोन बुलेट आणि एका कारचे नुकसान झाले आहे. सोमवारी (ता. 29) रोजी सायंकाळी सव्वासहा वाजण्याच्या सुमारास ही घटना घडली. याप्रकरणी उरुळी कांचन पोलीस ठाण्यात टेम्पोचालकावर गुन्हा दाखल करण्यात आला आहे.
श्रीकांत दत्ता कांबळे (वय-24, रा. मुबारकपूर, ता. निलंगा, जि. लातूर) असे गुन्हा दाखल करण्यात आलेल्या टेम्पोचालकाचे नाव आहे. याबाबत स्वप्निल संभाजी बोधे (वय-27, व्यवसाय – खडी क्रशर सप्लायर रा. बोधेवस्ती, कोरेगाव मुळ (ता. हवेली) यांनी उरुळी कांचन पोलीस ठाण्यात तक्रार दिली आहे.
पोलिसांनी दिलेल्या माहितीनुसार, स्वप्निल बोधे यांचे उरुळी कांचन येथील चौधरी माथा परिसरात पुणे-सोलापूर रोडच्या कडेला ऑफिस असून खडी क्रशर सप्लायरचा व्यवसाय करतात. सोमवारी (ता. 29) रोजी सायंकाळी पावणेसहा वाजण्याच्या सुमारास स्वप्निल बोधे यांनी त्यांची महिंद्रा कंपनीची ‘निओ स्पार्टे’ कार आणि रॉयल एनफिल्ड ‘बुलेट’ऑफिससमोर पार्क केली आणि ते ऑफिसमध्ये गेले होते.
सव्वा सहा वाजण्याच्या सुमारास सोलापूर-पुणे लेनवरून पुणे बाजूकडून सोलापूर बाजूकडे जाणारा एक भरधाव आयशर टेम्पो चालकाचा ताबा सुटल्याने थेट डिव्हायडर तोडून विरुद्ध दिशेच्या लेनवर आला आणि बोधे यांच्या ऑफिससमोर उभ्या असलेल्या वाहनांवर आदळला. यामध्ये बोधे यांच्या महिंद्रा निओ कारच्या पुढील बाजूचे, तसेच उजव्या व डाव्या दोन्ही बाजूंचे नुकसान झाले. तसेच त्यांच्या बुलेट गाडीचे इंजिन, हँडल आणि समोरील बंपर पूर्णपणे तुटले आहे.
दरम्यान, याशिवाय, शेजारील गॅरेजमध्ये काम करणाऱ्या एका कामगाराची रॉयल एनफिल्ड बुलेटचे देखील नुकसान झाले आहे. अपघातानंतर धडक देणाऱ्या आयशर टेम्पोचा चालक श्रीकांत कांबळे याला पकडले. याप्रकरणी स्वप्निल बोधे यांनी दिलेल्या फिर्यादीवरून टेम्पोचालकावर उरुळी कांचन पोलीस ठाण्यात गुन्हा दाखल करण्यात आला आहे. पुढील तपास सहायक फौजदार रमेश भोसले करीत आहेत.
